Aizawl: Mizoram Journalists' Association President Pu Vanlalrema Vantawl chuan, "Press mite hi hnathawk dangte anga inthlahdah thei kan ni lo a, hriatna leh thiamna kawngah nitin intahhriam reng kan ngai a ni," a ti. Nimin a Champhai District MJA hruaitute nen Circuit House a an inkawm naah MJA President chuan bul tan that nan tlai a awm lo tih sawiin zir ngai a awm chuan Journalist te chu inzir thar zel tur an ni tih a sawi a. Sawrkar thlawp that a pawimawh tih sawiin, "Eng party pawh sawrkar se tha taka kan thawhpui a pawimawh a. Mah se kan eizawnna leh kan pawl hi chu party politics hian a tibal tur a ni lo a, hetianga tih tum an awm anih chuan MJA hmelma an ni tih kan hriat a tha a ni," a ti. MJA general headquarters Executive chuan natna leh harsatna engemaw bik tawk ni lemlo, mahni hna leh eizawnna titha peihlo te nen chuan inzawmna chhut chah mai tha zawkin a hria tih sawiin "MJA chu a taka Journalism luhchilh te chauh awmna pawl tur a ni" tiin inpumkhat leh inngeih tlang taka awmho zel turin a chah bawk. MJA gen.hqrs. leh Champhai District MJA te inkawmna hun hi Pu Lalremsiama, Secretary i/c Welfare, MJA Gen.Hqrs. in a kaihruai a. MJA hmalakna leh hmachhawp chungchangah te inpawh tlang takin an sawiho a, nimin khan Aizawl panin a lo let leh a ni.