Press miten hmun hlui an tlawhAizawl: NEDP bultumin Aizawl a chanchinbu mi thenkhatte chuan November 15-17, 2017 chhung khan Mizoram khawchhak lama hmanlai hmun hlui thenkhatte an tlawh. Aizawl chanchinbu mite hian Khawbung khuaa Mizo thu leh hlaa hmingthangte thlan Hla kungpui mual, Lianchhiari lunglen tlang, Vangchhia khuaa Kawtchhuah ropui leh Rih dil te an tlawh a ni. Khawbunga Hla kungpui mualah hian Mizo thu leh hla thiam mi 36 thlan dah a ni a, an zinga 15 hi thuziak thiam an iin a dang hi hlaphuah thiam an ni. Hla kungpui mual enkawltute chuan thu leh hla lama Mizo mi chhuanawmte chu kum 5 danah sengluh thin an ni tih an sawi a. Hla kungpui mual chu tlawhtu an awm deuh reng nia sawiin a chang chuan ni khatah tlawhtu mi 200 chuangte pawh an awm thin niin an sawi bawk. Vangchhe khuaa Zofate thlangtlakna nia sawi Kawtchhuah ropui pawh chanchinbu mite hian tlawhin hmanlai pipute sulhnu hrang hrang an en bawk a. Helai hmun hi Archeological Survey of India chuan a humhalh leh a zirchian mek a ni a, tuna humhalh chhungah hian thlanlung 244 a ding mek a, heng thlanlungah te hian milem chi hrang hrang eng emaw zat a awm a ni. Vangchhe khawtlang hruaitute chuan India ram mai bakah ram dang atang pawhin zirchiang tur leh rawn en hrim hrim mi eng emaw zat an rawn kal tawh tih an sawi a, lungphun lian pui pui leh thil ziak mak tak takte chu a siamtute an hre bik lo tih sawiin kum eng emaw zat kalta siam ni tawh mah se ruahmanna felfai tak hmanga siam a ni chu mak an ti hle tih an sawi bawk. Press mite hian Lung van do te, Lianchhiari lunglen tlang leh Mizo history a hmun laili rang rengtu Rih dil te an tlawh bawk a, hlawkpui an inti hle. NEDP study tour a chanchinbu mi zinte hi I&PR Deputy Director C.Lalnunkima chuan a ho a ni.