Aizawl; Aizawl chanchinbumi thenkhat chuan Baktawng, Serchhip leh Thenzawl-a hmalakna thenkhat tlawhin Baktawng Tlangnuam a furniture workshop leh bel chhunga (siam) eizawng chhung kaw khat ve ve an tlawh a. Heng mite hian NLUP avanga bultanna tur leh hmanraw leina an nei chu an lawm hle tih sawiin an sum lakluh pawh nasa takin a pun phah tih an sawi bawk. Serchhip ah hian furniture leh ar vulh hlawhtling te tlawhin Serchhip Ramthlun venga carpentry trade thlangtu tawngtheilo Rohnuna chuan Press mite rilru a khawih hle. Rohnuna (tawngtheilo) hian NLUP sum a dawn hmangin khawl thar a lei a, anmahni in hnuaiah workshop siamin furniture chi hrang hrang a siam a, thla khatah Rs. 25,000 vel a lalut thin a ni. Amah hi kut themthiam tak a ni a, midangte siam theihloh Serchhip DC thutthleng tur pawh a siamsak niin an sawi. Thenzawl ah hian puantah hlawhtling leh carpentry a hlawhtlingte an tlawh bawk a, heng mite pawh hian NLUP avanga an sum lakluh a pun thu leh sawrkara an lawmthu an lo sawi vek a ni. Press mite chuan NLUP chhawr tangkaitu te hian anmahni bakah mi 3/4 te an chhawr tel vek avangin chhung kaw 5/6 eizawnna an siamsak zel tih leh rilru nei tak tak te chuan NLUP hi eizawn bultan nan an hmang ngei tih an hmu a ni. Media mite hi ni 2 thangin Zirtawpni zan khan Aizawl-ah an lo kir leh a ni.