Bihar Chief Minister Nitish Kumar chuan tun lai hian India politics titi a luah hneh hle a, Prime Minister chuh a tum tih thawmte a ri ta nawk mai. Hetiang boruak karah hian a tawng chhuak ta a, Bihar CM hian tun dinhmunah chuan PM nih tumna a neih loh thu a sawi. 

Kum 71 mi Nitish Kumar hi August 10, 2022 khan Bihar Chief Minister atan a vawi kua nan lakluh leh a ni a, BJP te nena an thawhhona chu a titawp. Bihar-ah hian Nitish Kumar-a kaihhruai Janata Dal (United) leh BJP te hian hun eng emaw chen sawrkarna an siam a, mahse tun hnai khan JDU hian BJP an thawhpuina hi titawpin opposition party te nen tangrual sawrkar an siam. 

BJP an thawhpuina an tih tawp avang hian Nitish Kumar hian India politics-ah thawm a rawn nei lian chho hle a, kum 2024-a Prime Minister thlanna neih turah pawh chuh a tum niin an sawi. Mahse hei hi a pha nghal thuai a, tun dinhmunah chuan PM nih tumna a nei lo tih a sawi a, an thawhpui party te nena thawhhona tha tak neih chu a ngaihpawimawh hmasak a nih thu a sawi. 

Nitish Kumar-a kaihhruai Mahagathbandhan sawrkar hian majority an nei em tih August 24 hian floor test hmangin neih a ni dawn a, assembly-ah thlawptu member 164 tal an awm a ngai dawn a ni. A cabinet pawh a tilian dawn a, a kaihhruai JDU aiin an thawhpui RJD ten minister an ngah zawk dawn nia tarlan a ni.