Aizawl; Kum 2015 kumtir atangin Mizoram ah Employees State Insurance Scheme kalpui tan tum a ni a, he scheme hnuaia inziaklut te chu damloh nikhua ah an inenkawlna senso zawng zawng a thlawnin tumsak vek an ni dawn. Health department thawktute hnen atanga Zalen thudawn danin sawrkar hnuaia thawk nilo organise sector dang school, dawr, factory, bakery leh a danga thawk mi 10 ruai chin te chu he scheme hnuaiah hian inziaklut tura tih an ni dawn a. He scheme hnuaiah hian hnathawktu (employees) chuan an thla hlawh atanga chhutin 1.75% leh a chhawrtu (employer) in 4.75% an pe (contribute) ang a, hemi hmang hian damloh nikhuaa an inenkawlna senso zawng zawng, Doctor rawn man leh damdawi man tel vekin tum sak an ni ang a, hei hian Mizoram pawn thlenga an inenkawlna thlengin a huam dawn a ni. Health department thawktute sawi danin he scheme hnuaiah hian ITI veng ah Dispensary din a ni ang a, Doctor ten damlote enin a tul chuan Falkawn referral hospital ah an refer ang a, an mamawh dan a zir zelin Mizoram pawna damdawiin thlan bikah te a thlawnin enkawl chhunzawm zel an ni ang a, senso theih zat hi bithliah a awm lo (unlimited) a ni. Thudawn danin ESI Corporation chuan survey nei tawhin he scheme chhawr tangkai thei tur hi Aizawl ah mi 2000 atanga 3000 inkar vel an awm niin an hria a. Hnathawktute chu damloh nikhuaa an inenkawlna senso mai bakah a ruaitu ten an ban anih chuan he scheme atang hian hlawh pek an nih dawn bakah thla 6 chhung vek inenkawlna senso (medical benefit) hi an la dawng thei dawn a ni.