ZALEN September 9, 2025 : Mizoram Legislative Assembly Session neih zawh takah Health Minister Lalrinpuii chuan mimal damdawi in ten MUHCS an la zawm loh chhan ber chu cashless an duh loh vang nia a lan thu a sawi a. An la inbiak reng thu leh cashless an la pawm ngei an beisei thu a sawi bawk.

Hetihlai hian Non-Government Hospital Association of Mizoram (NGHAM) chuan June 30, 2025-a Commissioner & Secretary, Health & Family Welfare Department, Government of Mizoram hnena lehkha an thawnah cashless pawh engemaw chen an zawm theih tur lehkha an thawn chu tun thleng hian chhanna an la dawn lo tih ZALEN chuan thu a dawng.

NGHAM hian Commissioner & Secretary, Health & Family Welfare Department, Government of Mizoram hnenah hian a hnuai a mi ang hian lehkha an thawn :

...... Non-Government Hospital Association of Mizoram (NGHAM) hmingin chibai kan buk a che. June Ni 25, 2025 (Nilaini) chawhma dar 11:00 a, i kaihhruaina hnuaia NGHAM hruaitute leh Mizoram Healthcare Society hotu te nena meeting kan neih tuma “NGHAM hian MUHCS chungchanga an duhdan ziakin rawn thlen se” tih chu hetiang hian kan rawn thlen a ni.

NGHAM member hospital ten MUHCS kan zawm theih dan turte :

1) Cashless hi sawrkar hospital leh private hospital thenkhat, MUHCS zawm fel tawh ho-ah kalpui chhunzawm nise, NGHAM member hospital ah te chuan reimbursement in kalpui nise kan ti a ni. Hetianga kan kal thei lo anih chuan ahnuaia tarlan ang hian kalpui nise kan ti a ni.

i) NGHAM member hospital-ah te hian MUHCS package rate-in a huam chin bak te chu damlo-in a chawi ang.

ii) A chunga tarlan, Point No i hi a thei lo anih chuan NGHAM member hospital te rate hmanlai theuh hi a nih ang anga pawm nise kan ti a ni.

Financial Securities

i) NGHAM member hospital te tan hian sawrkarin financial security tha tak, hman nghal theiha dahlawk nise kan ti a ni. 

ii) NGHAM member hospital te tana financial security dah hi hospital pakhat chauh pawhin hman tur a nei tawh lo anih chuan automatic-in NGHAM member hospital te chu Reimbursement System-ah an lut lailawk ang a, Ni 30 chhunga financial security hi dah khah leh anih chuan cashless in kan kal chhunzawm ang a, mahse he huntiam chhunga financial security hi dah khah leh anih loh chuan NGHAM member hospital te hi Reimbursement System-ah an awm hlen tawh ang.

Hengte bakah hian, NGHAM member hospital te tan hian :

a. MUHCS Guidelines-a damlo admit dawna Pre-Authorisation kan lak rual hian Pre-Authorised amount hi Hospital Bank Account-ah rawn thun nghal zel ni rawh se.

b. Final approved bill hi upload anih atanga darkar 2 chhungin approve ni se, hemi hun chhunga approval acknowledgement kan dawng lo anih chuan approved anga ngaih a ni ang. Approved tawh bill reng reng chu a amount khawih danglam emaw reject theih a ni tawh lo ang.

c. Final approved bill hi submit anih atanga Ni 7 chhungin Hospital Bank Account-ah thun zel ni se, Ni 7 chhunga thun hman anih loh chuan, nikhatah Rs 500 zel, bill pakhatah sawrkarin a chawi (penalty) thin ang.

d. Pre-authorisation lak hman loh, damlo admit nghal ngai si-ah chuan hospital-in security deposit lak ni se. He security deposit hi Pre- authorisation hmuh hunah damlote hnenah pek let leh tur a ni.

Heng kan rawtna rawn thlente hi khawngaiha min tihhlawhtinsak theih chuan kan lawm hle ang.