ZALEN Aizawl 2, 2026: Non-Government Hospital Association of Mizoram (NGHAM) Member Hospital, MUHCS la zawm ve lo - Trinity Hospital, Ebenezer Hospital, Greenwood Hospital, Aizawl Hospital, LRM Hospital, Agape Multispeciality Hospital, Rosewood Hospital, City Hospital leh Aizawl Adventist Hospital te chuan MUHCS an la zawm ve theih loh avanga damlo tam tak leh an chhungten an tuar thin pawi an tih thu thuchhuah an siamah an tarlang.

NGHAM chuan MUHCS an la zawm theih loh chhan leh damlo tam tak anmahni mamawh leh pan thintute harsatna tawh leh mipui tam zawk ban phak a an hospital te kan awm theih dan tura an rawtna leh ngenna te sawrkar leh mipui hriat atan hetiang hian an tarlang.

MUHCS 2.0 hnuaiah hian a zawm ve lo Hospital-ah emergency thilah emaw, khum chan loh avang emaw a damlo rawn lutte hi an thahnemin mi tam tak an mangang em em thin a. Amaherawhchu tun dinhmunah Mizoram Sawrkar thuchhuah, April 30, 2026 ami ang chuan heng a hnuaia damlohnate - 1. Damlo ICU a dah nghal ngai, 2. Nunna chhanhim nana zai nghal ngai leh 3. Accident tawk nunna chhan nghal ngai te chauh bill phalsak an nih avangin emergency dang zawng zawng admit ngai si, entirnan; BP sang lutuk te, Zunthlum sang te, Heart Attack te, Nikhawhrelo a awm te, puitling leh naupang khawsik sang, emergency si ICU awm ngai si lo chuan an bill thei lo vek a, hei bakah hian MUHCS zawm hospital atanga facility tha zawk mamawh vanga a zawm lo hospital a kal a ngaihin an bill thei lo bawk a ni. Hei hian MUHCS subscriber mai bakah Sawrkar hnathawkte pawh a huam vek a ni, an ti. 

Hetiang a nih avang hian NGHAM chuan sawrkarin rate tha pangngai tak, kohhran hospital thenkhat leh hospital dangte pawh a pek ang emaw, phaia hospital tam takte a pek ang emaw a an pek theih chuan MUHCS zawm hi an hnial lova, an zawm hian mipui te tan thatna tam tak a neih dawn avang te, phaia pawisa tam zawk sen ngai lova Mizoram chhung ngeia inenkawl a theih chuan mi tam tak tan malsawmna a ni dawn a, ram economy in a that phah dawn bawk a ni, an ti bawk. 

NGHAM chuan, "Mizoram a Private Hospital-te hian kan ram tan Entreprenuership development ah a thawh hlawk pawl tak ni ve in kan inhria a, medical lamah hmasawnna tam tak thlentu kan nih piah lamah thalai tam tak tan hna, a sang tel siamtu kan ni mek a ni.

"Mizoram Sawrkar hian Mizoram a Private Hospital kan neih ve te hi phai lam hospital inremna zulzuiin inremna min siam pui thei se kan duh hle a. Hospital thenkhat, MUHCS cashless a zawm lo, an hnena inenkawlte erawh MR bill thei si (Deemed Empanelled) hospital, entirnan : Woodland Hospital, Shillong leh Silchar Cancer Institute, Silchar te dinhmun ang tala MUHCS kan zawm ve theih hma pawhin min dah turin kan ngen a, hei hi mipuiin nasa takin kan hlawkpui ngei kan beisei a ni," an ti.