ZALEN, Oct. 29, 2024: Zudio LPS Pro Fight 2024-ah Mizoram pawn atangin mi pakua an tel a, Mizo hmeichhe boxer thate inlanna hun hawnsakin December 6-ah Title Fight neih a ni dawn.

Thawhtanni khan Mizoram chhung leh pawn atangin tel tur boxer 280 an inbuk a, khaw dang atanga inbuk hman tura inngaiten lirthei chhiat avanga harsatna an tawh avangin hriatthiam an ni a, technical lamin an tihchhian hnuah title chuh turin boxer 283 ziah luh an nih bakah champion lai pathum - Laldinsanga (bantam), Lalruatzela hauzel (welter) leh C Lalhruaitluanga (middle) nen a vaiin boxer 286 an tel dawn.

Weight hrang pangngaah Mizoram pawn atangin tel an awm vek a, middle-ah tam berin pathum an inlan dawn a, an vaiin state pawn boxer pakua ziah luh an ni a. Heng mite hi Mizorama an kalna leh hawna man bakah an tel chhunga an mamawh phuhruk nan Rs. 5,000 theuh pek an ni dawn.

Zirtawpni zanah LPS Arena, Falkland-ah tanin November 23-ah weight hrang panga atangin round of 16 zawh vek a ni dawn a, November 25, 26, 27-ah quarterfinal, November 29 leh 30-ah semifinal chhunzawmin December 3-ah title chuh tur zawnna final a ni dawn a, hetah hian Mizo hmeichhe boxer thate tan hun siamsakin exhibition bout tum hnih a awm tel dawn a ni.

Fly champion lai, NT Lalbiakkima a tel dawn lo va, welter-ah light champion lai, HC Lalramfela a insawn bawk a, title humhim tur an awm loh avangin fly leh light-ah a hranpain title chuh tur zawnna final a awm dawn lo va, semifinal-a chak pahnihin champion nih an inchuh zui nghal ang.

Ninganiah LPS Office, Zarkawtah fixture tar chhuah a ni dawn a, weight hrang pali - fly, bantam, light leh welter-ah tawn hriat nei leh nei lo then hran a ni a, seed nei boxer 28 an awm.

Fly-ah boxer 91-in title an chuh dawn a, Vanlalenkawltira (Champhai Dinthar), Lalrinngheta (Tuipui), Emmanuel Vanlalthlengliana (Melthum) nen mi pariat seed pek an ni.

Bantam-ah Dinsanga kawnghren kawl lai chhuhsak tumin boxer 67 an tel a, seed pariat pek zingah Omega Lalramdina (East Kulikawn), Sebastian VL Rinnunga (Ramthar Veng), Zohmingliana Sailo (North Vanlaiphai) an tel a ni.

Ramfela kalsan light tlahlang chuh tura tel boxer 65 atangin mi pariat tho seed pek an ni a. C Lalhruaitluanga (Cherhlun), Ramdinthara (Pangzawl), David Laldanmawia (Chanmari, Lunglei) leh Vanlalringa (Serchhip) te seeded zingah an awm a ni.

Welter champion lai, Ruatzela hmachhawn tumin boxer 37 an inziak lut a, bantam leh light-a champion tawh, Ramfela (Chawngtlai) leh National Games-a silver medal hnek chhuak thei, Lallawmawma (Tuipui) an langsar a, middle champion C Lalhruaitluanga (Chawngtlai) hneh tuma inlan tur boxer 23 zingah nikum title fight-a chak zo ta lo F Lalthanliana Jr (Electric Veng, Lunglei) leh 2019 champion C Lalduhawma (Bethlehem Vengthlang) an tel bawk a ni.

Zudio LPS Pro Fight 2024

BOXER TEL ZAT - 286

* State pawn boxer zawng zawng 9

* Technical lamin kawng laka lirthei chhia avanga a huna inbuk hman lo hriatthiamna an neih avangin a tir aiin tel an tam a. Boxer 283 ziah luh an ni a, champion lai pathum - Laldinsanga (bantam), Lalruatzela Hauzel (welter) leh C Lalhruaitluanga (middle) nen a vaiin boxer 286 an tel ang.

MIDDLEWEIGHT (KG 67-74) - 23

* A hrana seed pek an awm lo va, C Lalduhawma (Bethlehem Vengthlang, 2019 champion) leh F Lalthanliana Junior (Electric Veng, Lunglei, 2023 Title Fight) te champion lai tum tur zawnna final chauh an intawng thei dawn a ni.

* State pawn boxer 3 - Martin Thangsiamlal (Lamka, Manipur), Kolos TKSin (Silchar, Assam), Thanggoulian (Madanrting, Shillong, Meghalaya).

WELTERWEIGHT (KG 61-67) - 37

* boxer pali seed pek an ni - HC Lalramfela (Chawngtlai, 2023 light champion, 2015 bantam champion), Lallawmawma (Tuipui, 2022 National Games silver medal, North East Olympics gold medal), Ruatfela Zote (Saithah) leh Zoremsanga (Venglui). 

* State pawn boxer 2 - Manglianson (Lamka, Manipur), LK Mangboi Khongsai (Lamka, Manipur).

LIGHTWEIGHT (KG 56-61) - 65

* boxer pariat hnenah seed pek an ni a, chung zingah chuan C Lalhruaitluanga (Cherhlun, 2023 Title Fight) leh Ramdinthara (Pangzawl, 2023 Bantam Title Fight), Zonunzira (South Lungpher, North East Zone & State Level medalist), Vanlalringa (Serchhip, Pro Fight quarterfinalist, Pro Record - 2 win, 0 draw, 0 loss) an tel.

* State pawn boxer 1 - Mangnelson (Churachandpur, Manipur).

BANTAMWEIGHT (KG 52-56) - 67

* boxer pariat seed pek an ni - Omega Lalramdina (East Kulikawn, 2023 semifinalist, Pro Record - 2 win, 0 draw, 0 loss), Gregor Joseph (2022 Flyweight semifinalist), Sebastian VL Rinnunga (Ramthar Veng), Zohmingliana Sailo (North Vanlaiphai) an tel.

* State pawn boxer 2 - Mangkhanthang Guite (Lamka, Manipur), Thangbiakdik (Lamka, Manipur).

FLYWEIGHT (KG 48-52) - 91

* boxer pariat hnenah seed pek an ni - Vanlalenkawltira (Dinthar Champhai, 2023 Title Fight), Lalrinngheta (Tuipui, 2022 Bantam champion), Emmanuel Vanlalthlengliana (Melthum, 2023 semifinalist), Lalzaenpuia (2023 Mizoram Fight Night champion) leh C Lalchhanhima (Mamit) an tel.

* State pawn boxer 1 - Kaplianlam (Lamka, Manipur).