Tata SK 612 LPS Pro Fight-a tel tur tan Thawhlehni chawhma dar 10:00 atangin LPS Office, Zarkawt, Aizawlah entry form pek chhuah a ni a, tlai dar 3:00 thlengin mi 50 deuhthawin an la chhuak hman tawh.

Darkar nga chhunga form la chhuak mi 49 zingah 2022 welterweight-a semifinal lut, Mission Veng boxer Lalruatzela Hauzel a tel a, theh lut nghal 12 zingah a tel a ni.

Form pakhat Rs 10 zelin an la chhuak a, kum 17 chin chung lam tan weight hrang panga - fly (kg 48-52), bantam (kg 52-56), light (kg 56-61), welter (kg 61-67), middle (kg 67-74)-ah a tel theih a ni a, September 20 ral hmain theh luh tur a ni.

October 2 khian LPS Arena, Falkland Veng, Aizawlah Tata SK 612 Pro Fight tan a ni dawn a, November tir lamah weight hrang pangaah champion tifelin Title Fight huaihawt tura ruahman a ni.

Nikum khan weight hrang panga - fly, bantam, feather, light leh welter-ah champion zawn a ni a, boxer 211 an tel a, champion laite hi an tel dawn a nih chuan an awmna weight-ah seed pek an ni ang.