Tata SK 612 LPS Pro Fight best boxer-ah bantamweight champion Laldinsanga thlan a ni.

Inrinni zan khan LPS Arena, Falkland-ah boxer 281 telna Pro Fight zawh fel a ni a. Flyweight champion NT Lalbiakkima leh lightweight champion HC Lalramfela te nen buk an nih hnuah Lunglei Ramthar tlangval, Dinsanga kutah boxer tha ber chawimawina hlan a ni.

Kum 20 mi, Dinsanga hian Ather Electric Scooter dawngin Pro Fight vawi 10 buatsaih a nih tawh chhunga best boxer-in lawmman an dawn that ber a ni a. Nikum khan flyweight-ah a champion a, a bitum knockout vekin phu takin best boxer-a thlan a ni tawh.

Kum 2022 kha Pro Fight-a a tel hmasak ber a ni a, kuminah weight rit zawk, bantam-ah insawnin kum kal ta angin Dinsanga tan kawng a awlsam lo.

Knockout hmanga vawi ruk a chak zawn hnuah Lunglei Ramthar boxer ve bawk leh amah hre chiangtu, David Laldanmawia nen semifinal-ah an intawng a, round li la vek mah se knockout hmanga vawi ruk a chak zawn tawhna a tawp.

Title Fight-ah inlehthalna pumpelh hramin Ramdinthara lakah a chak a, Pro Fight-a vawi riat a inhnek tawhah round a hloh hmasak ber a nih bakah derthawng takin a champion hram.

Chutih rualin fiahna khirh a pal tlang a, kum zawna boxer tha ber chawimawina a dawn theih phah.

Dinsanga hian boxrec-a chhinchhiah chin professional huangah hnehna a la chang vek a, vawi ruk chak tawhin knockout-in tum li hnehna a chang.

Title Fight-a a inlan hmasaka berah Vanlalenkawltira’n flyweight champion nih tum hle mah se Biakkima a hneh lo a, a chak loh danin sawi zui a hlawh hle.

Kum 20 mi, Champhai Dinthar boxer hi KT Enterprise Promising Boxer-a thlan a ni a, trophy leh Rs 10,000 dawngin hmabak êng tak nei chungin championship a thlah liam.

Bantamweight-ah Ramdina’n rin hlawh lo zawk ni chungin semifinal-ah Omega Lalramdina a hneh a, title fight-ah Dinsanga nen round li chhung huaisen takin an inhnek tluan zak a, tawn hriat a tlachham vangin a tawp dawnah a che sual.

Best boxer Dinsanga nena an inbeihna hi Pro Fight chanchina inhnek hmuhnawm ber ang hiala sawi zui a ni a; champion zo lo mah se Pangzawl fighter hi KT Enterprise Best Challenger-a thlan niin trophy leh Rs 10,000 hlan a ni.

Nikum ang bawkin KT Enterprise Best Referee-ah Lalchhanhima Hnamte, Armed Veng leh KT Enterprise Best Judge-ah Lalmalsawma, Hnahthial thlan an ni a, trophy leh Rs 7,500 ve ve an dawng a ni.