LPS Arena, Falkland Vengah Tata SK 612 LPS Pro Fight chu Thawhtanni zan hian tan a ni dawn a, hawnna inkhawm tawi tê neih a nih hnuah inhnek vawi 10 awmin LPS 1-ah chiah live-a pek chhuah a ni ang.

Zanin dar 8:00-ah tan a ni dawn a, LPS Arena tharin event a thlen hmasak ber a ni nghal dawn a, Pro Fight hawnna inkhawmah nikum November 8-a chatuan ram pan ta, Organising Committee member leh Ring Announcer Joy Zairemmawia sun a ni dawn a, Organising Committee Chairman Lalsawmliana Pachuau chuan thu sawiin Rosy K Remsangpuii a zai ang.

Inhnek vawi 10 a awm dawn a, LPS 1-ah chauh live-in Pro Fight pek chhuah a ni dawn a, LPS YouTube channel-ah highlight dah thin tur a nih bakah championship a zawh hunah inhnek pawimawh thenkhat a pum puia dah zui leh a ni ang.

Tun kar chhungin inrinni thleng zan tinin inhnek a awm dawn a, a hmuna en duh tan man chawi lova en theih a ni dawn a, kar leh atangin a hmuna en tur tan ticket Rs 50 leh Rs 500-in lei a ngai dawn a ni.

Zan hmasa berah flyweight inhnek vawi nga awmin Jacob Malsawmdawnga (Tuikhuahtlang) leh Vanlalhriatpuia (Phullen), Lalhriatzela (Maubawk) leh HS Ramnunthara (Samlukhai), Remruatpuia Buhril (Vaitin) leh Lalrammuana (Tanhril Vengpui), Malsawmtluanga (Bawngkawn) leh Vanlalmalsawmdawngliana (Saitlaw), Joney Laltanpuiaa (Thingsulthliah) leh Lalchhuankima (Samlukhai); bantam-ah vawi hnih - Lalhriatpuia (Phunchawng) leh Sumrosanga (Sakawrdai), Lalramtluanga (Khuangthing) leh Lalduhawma (Luangmual); light-ah tum hnih tho - Lalpeklawma (Vangchhia) leh Khupchhing Lalvenhima (Bungtlang South), Malsawmkunga (North Chaltlang) leh Malsawmtluanga (Ramthar North); welter-ah Zonunsanga (Bawngkawn) leh Chanchinmawia (Lungsen) an inhmachhawn dawn a ni.

Weight hrang pangaah lawmman Rs 6,50,000 sem chhuah tura ruahman ni mah se middle-ah boxer 16 an tlin loh avangin weight dangah quarterfinal lutten lawmman pawisa fai an dawn laiin semifinal lut chin hnenah pek a ni dawn a; quarterfinal-a tlain Rs 5,000, semifinal lutin Rs 10,000, champion hnenah Rs 60,000 leh pahnihnain Rs 30,000 an dawng dawn a ni.

MST Motors-in boxer tha ber hnenah Ather electric scooter a pe dawn a, KT Enterprise-in boxer mi mal lawmman bakah referee leh judge tha ber hnenah lawmman tha tawk tak tumsakin, inhnek zan apiangin GIG Motors Fighter of the Night hnenah lawmman pek thin a ni bawk ang.