ZALEN, Oct. 24, 2024: Mizoram pawn atanga Zudio LPS Pro Fight-a telte tan hamthatna inang tlang siamsak a ni dawn.

Organising Committee chuan sumo fare angin Aizawl an kalna leh hawna man a tumsak dawn a. Championship-a an tel chhungin an thleng sang emaw, an tla hma emaw, an mamawh phuhruk nan Rs 5,000 theuh a pe bawk ang.

Hun tawp, October 19 thlenga entry form theh lut 320 chuang zingah Mizoram pawh atangin Pro Fight ngaihluin boxer 13 - Lamka, (Manipur) atangin pasarih, Meghalaya atangin pali, Assam leh Myanmar atangin pakhat ve ve an awm.

An inbuk fel hnua inhnek thei tur ziah luhte hnenah hamthatna pek a ni dawn a, Mizorama awm sa raltlante erawh a huam lo ang.

Pro Fight vawi 11-naah hian Title Fight bik chauh khawvel puma professional boxing chhinchhiahna boxrec-ah ziah luh tur a ni a. Title Fight neih a nih hmain weight hrang hranga champion laite leh title chuh tura tlingte an inbuk tha leh ang.

Champion lai tel lovin Thawhtanni zing dar 8:00 atanga chhun dar 12:00 chhungin LPS Arena, Falkland-ah tel tumte an inbuk dawn a, an hriselna endik hmasak a ni ang a. Hemi ni chawhnu dar 2:00-ah referee leh judge turten clinic an nei zui nghal bawk ang.

November 1 zanah LPS Arena-ah tanin a hawnnaah hian Youth Icon Lalsangliana a zai dawn a, man chawi lovin a hmunah a duh apiang tan en theih a ni ang.