ZALEN, Oct. 21, 2024: Zudio LPS Pro Fight champion nih tumin boxer 322-in entry form an theh lut a, October 28 khian LPS Arena, Falkland-ah inbukin tel tur zat dik tak hriat theih a ni ang.

September 23 atangin LPS Office, Zarkawtah tel tumten lehkha theh lut tanin Inrinni thleng khan hun hawn a ni a, weight lian pahnihah boxer 65-in form an theh lut a; a rit ber, middle-ah 23 niin an tlem ber a, weight tê pathum - fly, bantam leh light-ah tel tumin boxer 257-in an inpe lut.

State thenawm, Lamka, Manipur atangin boxer pasarih, Meghalaya atangin pali, Assam leh Myanmar atangin boxer pakhat ve vein lehkha an theh lut a. Mizoram pawn atangin boxer 10 chuangin tel an tum.

Thawhtanni zing dar 8 atanga chhun dar 12 thlengin LPS Arena, Falkland-ah an hriselna endik hmasain an inbuk dawn a, hemi hnu hian tel tur zat dik tak a hriat dawn a, October 31-ah LPS Office-ah fixture tar chhuah a ni ang.

Nikum khan weight hrang pangaah boxer 281 an tel a, tun tumah hian title fight-ah bantam champion Laldinsanga, welter champion Lalruatzela Hauzel leh middle champion C Lalhruaitluanga ten anmahni cho thei tur an lo nghak dawn a. Title humhim turin fly champion lai, NT Lalbiakkima dinhmun a chiang lo ve thung a, HC Lalramfela’n lightweight title kalsanin a tir atangin welterweight title a chuh dawn bawk.

November 1 zanah LPS Arena-ah tanin December kar khatna thleng a awh dawn a, weight hrang pangaah lawmman Rs 6,50,00 sem chhuah a nih dawn bakah KT Enterprise-in boxer, referee leh judge tithate chawimawina tumsakin GIG Motors-in fighter of the night lawmman a tum dawn bawk.

Pro Fight hnuhnung vawi ngaah Tata commercial vehicle dealer Zothan Autoworks-in title sponsor vawi li changin tun tumah an hnuaia dawr thar an hawn tur, tunlaia India rama thang chak tak, thawmhnaw man tlawm zawrhna, Zudio hmingchawiin championship neih a ni ang.

D3 Business Enterprise, RS Traders Third Eye Solution, Thansanga & Sons Auto Division Yamaha Racing, Orient Goldsmith, Kuriz Colection leh Wurfel ten an sponsor bawk.