Mizoramin Legislative Assembly member a thlan dawn avangin Tata SK 612 LPS Pro Fight quarterfinal leh semifinal khelh hun sawn hma a ni a, a dang zawng a ngai anga kalpui a ni ang.

October 30, 31 leh November 1, 2023 zanah quarterfinal khelh a ni dawn a, November 3 leh 4, 2023 zanah semifinal khelh a ni ve thung ang.

Fixture tihchhuah tawhah November 2, 3 leh 4, 2023 zanah quarterfinal khelh tur a ni a, November 6 leh 7, 2023 zanah semifinal khelh tura tih a ni.

November 7-ah Mizoram Legislative Assembly member thlan a nih dawn avangin Pro Fight quarterfinal leh semifinal khelh hun sawn hma a ni a. Chutih laiin ruahman sa angin October 28, 2023 zanah weight hrang pangaah round of 16 khelh zawh a ni dawn a, November 10 leh 11, 2023 zanah Title Fight leh Special Fight huaihawt a ni ang.

October 2, 2023 khan LPS Arena, Falkland Vengah Pro Fight vawi 10-na tan a ni a, Inrinni zan thlengin inhnek vawi 130 zawh tawh a ni.

Mizo boxer pathumin WBC India title chuh telin special fight pathum zeh tel tur nen hian a vaiin inhnek 279 a awm dawn a, Thawhlehni zanah chhunzawm a ni ang.

Weight hrang pangaah lawmman Rs 6,30,000 sem chhuah a ni dawn a; boxer 16 an tel tlin loh avangin middle-ah semifinal lut chinin lawmman pawisa fai an dawng ang a, weight dang paliah quarterfinal lut chinin an la thei dawn a ni.

Best Boxer hnenah MST Motors chuan Ather Electric Scooter a pe dawn a, Promising Boxer leh Best Challenger-in trophy leh Rs 10,000 ve ve dawngin, Best Coach leh Best Referee-in Rs 7,500 leh trophy an dawng ve ve dawn bawk a, KT Enterprise-in mi mal lawmman hi a tumsak ang.

Zan 28 inhnek huaihawt turah zan 11 zawh tawh niin GIG Motors Fighter of the Night thlan thin a ni a, lawmpuina lawmman pawisa fai hlan ziah a ni.