LPS Pro Fight-a tel tum tan August 15 atangin form lak chhuah theih a ni dawn a, Organising Committee chuan nikum aia tel an tam zawk a beisei hle.

2009 atanga 2019 thlengin amartuer huang chhungah professional zulzuiin promotional fight vawi riat buatsaih a ni a, 2022-ah professional fight tiin thlak a ni.

Kum kal taah professional kalphung zui a nih avangin Mizo boxer eng emaw zatin harsatna an tawk a, amatuer huanga khel zui thei lo tura hrem an ni dawn tiin vau lawk an ni a. Hei vang hian tel ngam lo eng emaw zat awm mah se weight hrang pangaah mi 211 ziah luh an ni a, promotional fight hnuhnung ber 2019 aiin boxer tel pangain an tam zawk tho a ni.

National Games hnuhnung ber leh India aiawha fehchhuak thinte atangin Indian boxing huang chhungah professional leh amatuer thliar hranna a awm lo tih chiang zawkin lang zel a. Kuminah boxer thenkhatin Pro Fight-a tel an hlauhna ber hremna tuar tura vauna boruak a awm tawh lo a, Organising Committee chuan tam zawk an inlan theih a beisei hle a ni.

Pro Fight-in professional kalphung zui tawh mah se inhnek tam zawk chu promotion fight a nih lai ang thova kalpui a ni a. Nikumah semifinal atangin professional chhinchhiahna boxrec-a ziah luh chauh a ni a, a hma lam zawngah boxer-te tan professional a nih avanga harsatna tawhna chhan tur eng mah a awm lo va, kuminah Title Fight chiah boxrec-ah ziah luh tur a ni.

Nikumah kg 48 atanga kg 70 inkar tan, weight hrang panga - fly, bantam, feather, light leh welter huangah tel theih a nih laiin, kuminah weight tipung chuang lovin huam zau zawkin ruahmanna thar siam a ni a, kg 48 atanga kg 74 thleng huamin fly, bantam, light, welter leh middleweight-ah tel theih a ni dawn a ni.

Organising Committee chuan Mizo boxer tam zawk an tel theihna tura siam rem a nih thu sawiin nikum angin pawn lam atanga boxer rilru tichiaitu tur boruak dang a awm tawh lo turah a ngai bawk.

Chuvangin, inhnekna mamawh boxer tam zawk tan kawng hawn a ni a, August 15 atangin LPS office, Zarkawtah Mizoram chhung leh pawn atangin a duh apiang tan form lak chhuah theih a ni dawn a, September 20 thlengin theh luh theih a ni ang.