ZALEN, Oct. 27, 2024: Zudio LPS Pro Fight 2024-ah flyweight champion lai, NT Lalbiakkiman title a humhim dawn lo tih a tichuang a, tel turte Thawhtanni zing atangin LPS Arena, Falkland-ah an inbuk ang.

Pro Fight chanchina boxer hlawhtling ber leh vawi ruk champion thei, Biakkima chuan mi mal thilah harsatna a neih avangin a inbuatsaih thei lo tih a sawi a, ‘ka duh tawk rih mai ang’ tiin a tel dawn lo tih a sawi.

Nikum title fight-ah split decision-in Vanlalenkawltira a hneh a, hemi hnu hian Biakkima a inhnek zui tawh lo. A tel dawn loh avangin flyweight-ah champion thar an awm dawn tih a chiang nghal a, light champion lai, HC Lalramfela pawhin title kalsanin welterweight-ah insawn tumin a inbuk dawn a ni.

Boxer 320 chuangin tel tumin entry form an theh lut a. Thawhtanni zing dar 8:00 atanga chhun dar 12:00 thleng inbukna hun hawn a ni a, a san zawng leh hlam thui zawng teh nghal a ni dawn a, an inbuk hmain an hriselna endik hmasak a ni bawk ang.

Champion lai pathum - Laldinsanga (bantam), Lalruatzela Hauzel (welter) leh C Lalhruaitluanga (middle) erawh an inbuk ve rih dawn lo va, anmahni cho thei tur lo nghakin boxrec-a ziah luh tur title fight dawnah an inbuk ang.

Ninganiah LPS Office, Zarkawtah fixture tar chhuah a ni dawn a, Zirtawpni zanah LPS Arena-ah tanin a hawnnaah hian Youth Icon Lalsangliana a zai dawn a, man chawi lovin a hmunah a duh apiang tan chhim theih a ni.

Pro Fight vawi 11-naah hian quarterfinal atanga title fight thlengin lawmman pawisa fai Rs. 6,50,000 sem chhuah a ni dawn a. Hei bakah hian KT Enterprise-in boxer, referee leh jugde thlan chhuahte tan lawmman tha tawk a pe ang a, inhnek zan apiangin GIG Motors Fighter of the Night thlan a ni dawn bawk.