ZALEN, Oct. 28, 2024: Champion tawh - HC Lalramfela, C Lalduhawma leh Lalrinngheta nen Zudio LPS Pro Fight-ah a tir atangin boxer 280 an tel dawn a, Ninganiah LPS Office, Zarkawtah fixture tar chhuah a ni ang.

Thawhtanniah LPS Arena, Falkland-ah an hriselna endik hmasak a nih hnuin tel thei turin boxer 280 an inbuk fel a, entry form theh lut atangin mi 40 chuang an inlan lo a, organising committee-in nikum aia tam an tel ngei beisei mah se pakhatin tun tumah an tlem zawk.

Chutih laiin boxing khel ngai lo leh vawi khat telna erawh kum dang aiin an tlem a, tun laia Mizo boxer tha leh beiseiawm, Pro Fight-a la inlan ngai lo eng emaw zat an tel ve thung a, inhnek hmuhnawm leh inelna sang leh zual a nih ngei a buatsaihtute chuan an beisei.

Weight hrang pang zingah fly-a tel an tam ber a, NT Lalbiakkima kalsan champion kawnghren rochun tumin boxer 89 an inbuk a; bantam champion lai, Laldinsanga title chhuhsak tumin boxer 66 an inziak lut ve thung.

Light-ah champion thar nih tumin mi 65 an tel a, welter champion Lalruatzela Hauzel cho theitu nih tumin mi 37 an inel dawn a, weight hrang panga zinga tel an tlemna ber, middle-ah C Lalhruaitluanga kut atanga champion kawnghren chhuhsak tumin boxer 23 an inbuk.

Pro Fight chanchina weight hrang pathuma champion hmasa ber nih tumin Ramfela’n light title kalsanin welter-ah chona thar a hmachhawn dawn a, middle title lak kir leh tumin 2019 champion Duhawma a tel bawk a, kum nga hnua Pro Fight-a a inlan leh hmasak ber tur a ni nghal dawn a ni.

2022 bantam champion Rinngheta’n nikum ang bawkin light title a chuh leh dawn a, kum kal ta khan title kalsanin weight rit zawkah a insawn a, semifinal a pal tlang zo ta lo thung.

Kum kal ta Title Fight-a chak zo ta lo - Ramdinthara, Lalhruaitluanga, Vanlalenkawltira leh Lalthanliana Junior te inbuk zingah an tel a. Mizoram chhung bakah Myanmar, Manipur, Meghalaya leh Assam atangin an tel bawk.

Ninganiah fixture tichhuakin Zirtawpni zan dar 8-ah LPS Arena, Falkland-ah an inhnek tan dawn a, a hawnnaah hian khuallian turin Sports Secretary Lalramsanga Sailo beisei a ni a, Mizoram State Sports Council hnuaia state level association 33 office bearer-te sawm an ni bawk.