Tata SK 612 LPS Pro Fight-a tel tur tan Thawhlehni chawhma dar 10:00 atang hian LPS Office, Zarkawt, Aizawlah entry form pek chhuah a ni dawn a, Mizoram chhung leh pawn atangin a duh apiang tel theih a ni.

Form pakhat Rs. 10 zela lak chhuah tur a ni a, kum 17 chin chung lam tan weight hrang panga - fly, kg 48 atanga 52; bantam, kg 52 atanga 56; light, kg 56 atanga 61; welter, kg 61 atanga 67 leh middle, kg 67 atanga 74 inkarah tel theih a ni ang.

Mizo boxer-te tana buatsaih a nih rualin hnam dang, Mizoram chhung leh pawn atang pawhin a duh apiang tel theih a ni a, chutih rualin senso anmahnia an intum vek a ngai thung dawn a ni.

October 2 khian LPS Arena, Falkland Veng, Aizawlah Tata SK 612 Pro Fight tan a ni dawn a, November tir lamah weight hrang pangaa champion tifelin Title Fight huaihawt tura ruahman a ni.

A hmawrbawknaah hian Pro Fight weight hrang pahniha champion lo ni tawh HC Johnkenty Vanhlimpuia’n professional boxing a luh chilhna tur inhnek buatsaih tum a ni a, vawi nga Pro Fight champion ni tawh NT Lalbiakkima leh Mizo professional boxing hriat hlawh zinga mi F Zoramchhana te inhnek zeh tel tum a ni bawk.

Nikum khan weight hrang panga - fly, bantam, feather, light leh welter-ah champion zawn a ni a, boxer 211 an tel a, champion laite hi an tel dawn a nih chuan seed pek an ni ang.