Zirtawpni zan khan TATA SK 612 LPS Pro fight title fight final zan khatna neih niin a hmuhnawm bakah inhnekte an inhnehtawk hle a ni.

LPS Arena, Falkland Veng-ah hian inhnekah pali a awm a, middleweight, super bantamweight (WBC India title), bantamweight (WBC India title) leh bantamweight te a awm a, Mizo boxer chhuanvawrte che a hmuhnawm hle a ni. 

Inhnek hmasa ber, middleweight huangah C Lalhruaitluanga, Chawngtlai leh F Lalthanliana Junior, Lunglei Electric Veng te innuaiin round tinah Hruaitluanga a chungnung zawk a, round a zawh meuh chuan 40-36, 40-36, 40-36 point hmuin unanimous decision-in a chak zawk.

Kum 25 mi, Hruaia hian nikum lama a welterweight champion belt chu humhimin a vawi hnih nan a title a hum thei a. Pro Fight weight hrang pahniha champion thei zingah a hming ziah lan a ni ve ta bawk.

Hruaia hian professional boxing tum sarih a khelhna niin chak loh a la nei lo va. Kum 23 mi, Thanliana erawh Pro Fight a vawi khat telna niin champion kawnghren a hreng haw thei ta lo hlauh thung. 

Super bantamweight hi WBC India title inchuhna niin F Zoramchhana, Cherhlun leh Adil Rajesh Kumar Singh, Mumbai ten title an inchuh a, beisei lawk angin Mizo boxer thain hnehna a chang.

Kum 24 mi, Zotea hian a hnek chhuak tam zawk a, judge-te point score dan chu 80-72, 80-72, 80-72 niin unanimous decision-in a chak a. Zotea hian Pro fight-ah hnuhma a nei tha lutuk lo va, 2017 atang 2022 chhung khan final-ah tum thum zet vanduai zawkah a tang tawh a, Zirtawpni zana a chak pawh hian hnukulh teuh chungin WBC India super bantamweight champion kawnghren hi a hreng a ni.

Title fight-a ṭum nga a inlannaah hlawhtling chauh mah se professional boxing a khelh ve chinah erawh a che tha chhe lutuk lo thung a, inhnek vawi ruk a hmachhawn tawhah tum thum chakna a chang ve tawh a. A khingpui kum 24 mi hian professional fight ṭum 14 hmachhawn tawhin tum kua chak-in vawi nga a tlawm tawh thung. 

Tuipui tlangval, Laldingliana'n bantamweight-ah a khingpui a hnehsawh hle thung a, WBC India title kawnghreng hreng turin round khat bak a mamawh lo.

Dinga hian a khingpui, Pradish A, Chennai chu round khat-na minute 2:53 naah technical knockout hmangin a hneh. 

Kum 24 mi Tuipui tlangval hian vawi hnih a hnek tlu a, referee Ajay Salvi chuan Pradish-a hi inhnek zu tlaka a ngaih loh vangin Dinga hi chak zawkah a puang a. Pradish hian professional boxing tum li inlan tawhin Dinga chiah hi a la ngam lo thung. 

Lunglei rawlthar inhnek hmuhnawm thei em em, Laldinsanga, Lunglei Ramthar mi pawhin beisei lawk ang ngeiin a tumpui a hneh a, bamtamweight final-ah a khingpui, Ramdinthara, Pangzawl chu unanimous decision hmangin a hneh a, judge ten point 38-37, 39-36, 40-35 an pe. 

Kum 2022 Pro Fight-a best boxer-a an thlan, Dinsanga hi GIG Motors Fighter of the Night-ah thlan niin Rs. 3,000 a hum haw a. Pro Fight weight hrang pahnihah champion kawnghren a hreng ve thei ta bawk.

Mi tam takin Mizo Muhammad Ali an tih mai, Dinsanga hian nikum khan a fight a piang hneh takin a knockout veka flyweight kawnghren a hreng haw tawh bawk a. Pro Fight-ah tum riat fight nei tawhin a la chak vek a ni.