Tata SK 612 LPS Pro Fight 2023 chu zanin hian title fight tan a ni dawn a, final-a inlan tur pali - F Lalthanliana Junior, Ramdinthara, Vanlalruatpuia leh C Lalhruaitluanga'n professional boxing an luhchilh nghal dawn.

Nikumah semifinal atangin professional boxing ziah luhna, boxrec-ah Pro Fight inhnek chhinchhiah a ni a, kuminah Title Fight chauh ziah luh a ni dawn a, supervisor turin Indian Boxing Council president Brigadier PKM Raja a lo kal a. India rama pro boxing promoter langsar pahnihin lo kal an tum bawk.

Lunglei Ramthar boxer Thanliana'n middleweight final lutin Zirtawpni zan hian LPS Arena, Falkland-ah Chawngtlai fighter C Lalhruaitluanga nen champion nih an inchuh dawn a; kumin kum tir Mizoram Fight Night lightheavy champion Thanliana hian professional boxing a khelh hmasak ber tur a ni a, a bitum tur Hruaia'n hnuhma tha tak nei mekin professional boxing a khelh tawh vawi rukah chak vekin mi pathum a knockout tawh thung.

Nikum Pro Fight bantam round of 16-ah Pangzawl tlangval, Ramdina a tla a, kuminah final lutin rin hlawh Laldinsanga nen Zirtawpni zanah vek hian title an inchuh dawn a, boxrec-a a inziah luhna hmasa berah hnehna chang nghal turin a hmabak a hautak dawn.

A inhnekpui tur, Lunglei Ramthar tlangval hi professional boxing vawi nga khel tawhin a chak vek a, heng zinga mi pali hi a knockout.

Saikhamakawn rawlthar, Ruatpuia'n Inrinni zan welter title fight-ah Mission Veng boxer Lalruatzela Hauzel a hmachhawn dawn a, inbeitawk hle tura ngaih an ni.

Pro Fight-a a tel vawi hnihnaah Ruatpuia'n final a luh avangin professional boxing a luhchilh thei dawn a, Ruatzela'n sulhnu chia siam tha turin hun tha a nei ve thung a, nikum semifinal-ah tlain boxrec-a a inziah luhna hmasa berah a tlawm a, kumin March khan LPS Fight Night-ah Vanlalringa, Serchhip a hneh lo leh a, professional boxing a khelh tawhah a tlawm ve ve.

Cherhlun boxer Hruaia'n light title fight-ah fiahna hmachhawnin Chawngtlai tlangval, HC Lalramfela a bitum dawn a, professional boxing a khelh vawi khatna tur a ni nghal a, 2015 Pro Fight bantam champion Ramfela'n tum nga hnehna chang tawhin vawi hnih a tlawm a, Hruaia nen an intawng rualin professional boxing tum riat a khelhna tur a ni.

Pro Fight hmawrbawknaah hian Mizo boxer-ten WBC India title chi hrang pathum an chuh tel dawn a, Mizoram boxing-in rahbi thar a kaina tur a dawn.

Pro Fight Organising Committee chuan Mizoram boxing-in mellung phun belha rahbi thar a kai theih nan hma an la tih an sawi a. Weight hrang hrangah Mizo boxer-ten WBC India title a tam thei ang ber kawl thei se an duh a, chu chuan hma lam pana ke an pen zelna tura awmzia a neih ngei an ring a, Pro Fight title fight-in Mizoram mai bak Indian boxing huang chhungah boruak lian zawk a neih theihna tur a nih ngei an beisei. 

Zirtawpni zanah title fight buatsaih a nih rualin WBC India super bantamweight title inchuhin F Zoramchhana, Cherhlun leh Adil Rajesh Kumar Singh, Mumbai intawngin WBC India bantamweight title inchuhin Laldingliana, Tuipui leh Pradish A, Chennai an inhnek dawn bawk.

Inrinni zanah Pro Fight title fight pathum awm ve thungin Vanlalawmpuia, Khuangthing leh Gugan Kumar, Chennai chuan WBC India super light title an inchuh tel ang.