ZMP Tlau tia hriat lar, Zomuanpuia Tlau chuan dan ang taka boxing hrui hrual chhunga inlan hmasak berah hnehna chang zo lovin a tlawm nghal.

Kolasib journalist, ZMP Tlau hi Nilaini zan khan Tata SK 612 LPS Pro Fight welterweight round of 32 luh inchuhin LPS Arena, Falkland-ah Daniel PC VL Ruata, Maubawk nen an inhmachhawn a, inhnek vawi 12 awm zinga a hnuhnung berah an intawng.

Kum 50 mi, tun hnaia kawng hrang hranga hriat a hlawh, ZMP Tlau hi round thum khelh tura duanah a tumpuiin round hnihna tawp dawnah a kawnghren hnuaiah a hneksak avangin a khelh zawm thei lo va. Round hnihna china jugde point pek dan hmangin thutlukna siam niin Unanimous Decision (20-18, 20-18, 20-18)-in a tlawm a ni.

ZMP Tlau hi September 15 khan Sete Academy, Mission Vengah a vawi khat nan boxing khelin Vungzamuana nen an inhnek a, dan ang taka endik a nih loh avangin chak zawk puan a ni lo va, tun tum hi dan pangngaia endikna hnuaia a inhnek hmasak ber a ni.