LPS Pro Muaythai Championship thla thara neih tura ruahmanna siam tawh chu inbuatsaihna leh remchanna avangin kum thar March-ah sawn hlat a ni.

Organising Committee chuan ruahmanna awm tawh ngun takin a ngaihtuah nawn a, inbuatsaihna kawng hrang hrang leh senso turte bakah player-te dinhmun thlir chungin sawn hlat mai ni se a ti a, March, 2024-ah changtlung zawka huaihawt thei turin thutlukna a siam a, tun dinhmuna sak mek, LPS Hall, Falkland-ah neih theih a nih ngei a beisei bawk a ni.

Muaythai Association of Mizoram President Brian Lalnunhlima chuan kawng hrang hrang ngaihtuahin sawn hlat hi thil tha zawk a nih thu a sawi a, player-te leh Pro Muaythai tuipuitute hriatthiamna ngen nghal a ni.

2010 khan LPS leh Mizoram Muaythai-in a vawi khat nan championship a buatsaih tawh a, kum 12 hnuah nikum khan hlawhtling takin R Dengthuama Indoor Stadium, Mualah huaihawt leh a ni a, weight hrang pangaah champion kawnghren inchuhin fly-ah Joseph Vanlalhruaia (Hunthar), bantam-ah Lalruatkima (Falkland), light-ah Ngursaimawia (Luangmual), welter-ah Zarmawia (Chite Veng) leh super middle open-ah Lalthasanga Lelhchhun (Tanhril Vengthar) te an champion a ni.