Vanlaltanchhana leh Laldinchhunga’n Thutak Nunpuitu Team tanpuiin Zirtawpni zanah 3-1-in Chhinga Veng Spikers an hneh a, Tata SK 712 Pro Volleyball League hmahruaitu an nihna an sawh nghet.

R Dengthuama Indoor Stadium, Mualpuiah TNT-in chona tling inkhel an hmachhawn a, dinhmun harsaah Chhinga Veng aia insiam rem awlsam zawk an nihna chhawrin 25-20, 17-25, 25-22, 25-23-in an chak.

Kawnpui chhuanvawr, Valbuanga’n point 22 hmuin a zawnin tum li D3 Business Player of the Match a ni a, Dinchhunga nen an thawh chhuah belh khawmin 40 a chuang a; league vawi li an khelh tawhah TNT an chak vek.

Tuipuiral an hneh tuma Zosangzuala nena an awltir, Tlangsam spiker Dinchhunga’n vawi 19 vaw tlain Valbuanga aia point khata hloh hnemin tum kua a tisual a; set thumna an lak theih nan a thawh hlawk a, a hnung atangin dik taka hlap thlak a nei nual.

Khelh hnih chak zawn chunga khel, Chhinga Vengin set khatna laihawlah an insawrbingna an hloh a. TNT rinrawl Valbuanga’n chet harsat ve tho mah se Sadraka Fanai leh Dinchhunga’n team awi nungin, 20-16-a sang zawk an nih hnuah harsa lovin an tlang.

Set hnihnaah Chhinga Vengin inkhel an tidanglam ve thung a, chungnung taka inlan, Javed Khan chuan lehlam banpharna chung atangin a hlap thla fo a, veikhawr Lalbiakmuana’n tha takin a thlawp bawk a, TNT talbuaiin an khing let zo lo.

Mahse, TNT an hnungtawlh rei duh lo. Set thumna an tan rualin an insiam rem nghal a, Javed-a vuak an dan hnuah K Lalfakawma hlap an dang tla leh a, 5-1-in hma an hruai.

Valbuanga’n a tanhmun siam thain a zia a chhuah bakah Dinchhunga nen hlawk takin an khel a; Spikers-in hnaih leh hman mah se 23-21 a nih hnuah Kawnpui tlangvalin tum hnih vaw tlain TNT a tlangpui.

Harsa lova set thum la zawn thei turin TNT-in inkhel an thunun zui a, set linaah 16-12-a sang zawk an nih hnuah 22-17-in hma an hruai leh.

Chhinga Veng intuai thar ve lehin hun pawimawhah point nga an hmu zawn a, an nih rual leh hman.

23-23 a nih leh hnu boruak sangah Valbuanga’n vaw tlain Spikers-in chhang let ve leh nghal tura hun tha an bawhpelh a, Zosangzuala’n deuce ngai lovin TNT chakna point hlu tak a thawk chhuak.

Set hnuhnung pahnihah Chhinga Vengin an hnaih hle a, an inthlauhna a tam lo. Rajasthan atanga an lak luh, Javed an chhawr rim a, point 29 a hmuh laiin 19 a hloh a, tihsual a ngah avangin team a nghawng.

Biakmuana’n point li hlohin 14 a hmu a, PC Lallianmawia’n vawi 10 a vuak tlak laiin point hnih paih a, tum danga khel tha thei tak, Faktea erawh talbuai tluanin, vawi hnih chiah tidikin point ruk a paih a ni.

Chhinga Veng tan semifinal beiseina a bo chuang lo va, khelh hnih an la neihah vawi khat an chak chuan an tlang dawn chiang a, Thawhtanni zanah Tuichangral nen an inhmachhawn leh ang.

Semifinal lut chiang sa tawh, TNT-in chak fai vek tumin Nilaini zanah league an khel zo dawn a. An elpui kumhlun, Hunthar nen intawngin Mizo hlanga champion hmasa ber nih an tumna kawngah fiahna a ni tel nghal ang.

Stats:
TNT:
Vanlaltanchhana: point hmuh - 22, point hloh - 8
Laldinchhunga: point hmuh - 19, point hloh - 9
Vanlalchhantluanga Sailo: point hmuh - 4, point hloh - 7
Sadrak Fanai: point hmuh - 9, point hloh - 6
Zosangzuala: point hmuh - 6, point hloh - 1
Lalliankima (setter): point hmuh - 1, point hloh - 3

CHHINGA VENG:
Javed Khan: point hmuh - 29, point hloh - 17
Lalbiakmuana: point hmuh - 14, point hloh - 4
K Lalfakawma: point hmuh - 2, point hloh - 6
Joseph Lalbiaksanga: point hmuh - 7, point hloh - 3
PC Lallianmawia: point hmuh - 10, point hloh - 2

POINT TABLE:
1. Thutak Nunpuitu Team: Play 4, Won 4, Loss 0 - Point 12
2. Hunthar: Play 2, Won 2, Loss 0 - Point 6
3. Chhinga Veng Spikers: Play 3, Won 2, Loss 1 - Point 6
4. Tuichangral: Play 3, Won 1, Loss 2 - Point 2
5. Durtlang North: Play 4, Won 0, Loss 4 - Point 1
6. Tuipuiral: Play 2, Won 0, Loss 2 - Point 0

FIXTURE:
JUNE 17 (INRINNI):
03:30 pm: Durtlang v Luangmual (hmeichhia)
08:00 pm: Hunthar v Tuipuiral (mipa)

JUNE 19 (THAWHTANNI):
03:30 pm: Power Dept Sporting Club v Bethlehem Vengthlang (hmeichhia)
08:00 pm: Tuichangral v Chhinga Veng Spikers (mipa)