Aizawl April 11, 2024 : 2016 atanga neih tan Mizoramah Volleyball hmanga inelna sâng ber Pro-Volleyball League chu LPS Arena, Falkland-ah April 23, 2024 atangin khelh a ni dawn. Mizoram Volleyball inelna sang ber hi Title Sponsor atan MST Motors ni turin inremna siampui a ni a, Championship hming atan 'Ather Pro Volleyball League 2024' tih a ni ang.

Mizoram Volleyball-in North East Olympic Games mipa Volleyball-ah Mizoram Team-in an khelhpui te lakah set hloh miah lovin an Champion a. Mizo player-ten Pro- Volleyball hian hma an sawn tih an lantira ngaih a ni. Hun rei tak State leh State inelnaa Champion no mawi an chawi tawh loh laia hetiang hun an tawng hian an hmasawn nasatzia a lantir.

'Ather Pro Volleyball League 2024' hi April 23-ah LPS Arena, Falkland Vengah mipa team ruk leh hmeichhe team nga inelna a vawi sarihna tan a ni dawn a ni.

'Ather Pro Volleyball League 2024' Sponsorship hi tihfel thawkhat tawh a ni tawh a; MST Motors bakah Zothan Autoworks, D3 Business Enterprise, GIG Motors, Ecosave Mizoram leh Orient Goldsmith chuan Championship an Sponsor a ni.

Kuriz Online Variety Store-in inkhel apiang-ah player of the match lawmman pein, kum dang ang bawkin KT Enterprise-in Championship-a che tha mimal chawimawina a pe leh dawn bawk a. He inkhel hi LPS-1 leh Youtube Channel lamah lei theih turin Live Telecast a ni ang.

A hnuaia mi hi Pro Volleyball League lo neih tawh zat leh 'Title Sponsor' lo ni tawhte an ni -

2016 : Zothan Autoworks Pro Volleyball League

2017 : GIG Motors Pro Volleyball League

2018 : RS Traders Pro Volleyball League

2019 : Suzuki Gixxer Pro Volleyball League

2022 : Zothan Autoworks Pro Volleyball League

2023 : Tata SK 712 Pro Volleyball League

2024 : Ather Pro Volleyball League