Tata SK 712 Pro Volleyball League inkhel hmasa berah nikum final-a intawng Durtlang North leh Thutak Nunpuitu Team an inhmachhawn dawn.

Ninganiah Hawla Indoor Stadium Conference Hall, Republic Vengthlangah Mizoram State Sports Council Secretary John Tanpuia’n fixture leh handbook a tlangzarh.

June 2, Zirtawpni zan dar 8-ah a hawn nan TNT-in nikum final-a an tlawmna chhang let nghal thei turin hun tha an nei dawn a, 25-20, 23-25, 25-21, 25-23 (3-1)-a an hneh loh Durtlang North nen an inkhel ang.

R Dengthuama Indoor Stadium, Mualpuiah vek an khel dawn a; June 8, Ningani tlai dar 3:30-ah 2019 champion Chhinga Veng Spikers leh kai thar, Tuichangral, zan dar 8-ah vawi khat aia tam champion thei awm chhun, Hunthar leh Tuichangral intawngin mipa team parukin round khatna an khel zo dawn a ni.

Hmeichhe team tha parukin title an inchuh dawn bawk a. Nikum final-ah Bethlehem Vengthlangin 18-25, 25-21, 25-14, 25-20 (3-1)-in Bungkawn an hneh a, June 3, Inrinni zan dar 8-ah hmeichhe league inkhel hmasa berah an intawng leh nghal dawn a ni.

June 5, Thawhtanni zan dar 8-ah Kanan leh Durtlang; June 6, Thawhlehni zan dar 8-ah kai thar ve ve, Luangmual leh Power Department Sporting Club inkhelin round hmasa ber an zo ang.

June 29, Ningani zan dar 8-ah hmeichhe final khelh a ni dawn a, a tuk zan dar 8-ah mipa final khel zuiin Mizoram volleyball inelna sang ber season rukna zawh a ni ang.

Nikumah mipa team nga leh hmeichhe team liin title inchuhin kuminah team tel pathumin an tam zawk a; team tinin Mizoram pawn atangin an duh zat player la lut thei mah se khelmuala lut paruk zinga state pawn player pakhat bak hman theih a ni lo a ni.

John Tanpuia chuan Pro Volleyball team-te duhsakna a hlan rualin volleyball hmasawnnain hma lam a pan zel dawn tih a sawi.

“Volleyball hi Mizoten kan tui em em a, thingtlang kilkhawr berah pawh kal ila hmun rem laiah inkhelhna a awm zel a ni. Sports Council-in dressing room leh gallery awm telna tur volleyball court thar 30 a siam mek a, volleyball stadium din turin hma a la mek bawk a, hma lam hun eng tak a nei a ni,” a ti.

PRO VOLLEYBALL LEAGUE
MIPA
2016: Champion - Anastasia Electric Veng, Pahnihna - TNT
2017: Champion - Hunthar, Pahnihna - Chhinga Veng Spikers
2018: Champion - Hunthar, Pahnihna - Tuichangral
2019: Champion - Chhinga Veng Spikers, Pahnihna - Durtlang North
2022: Champion - Durtlang North, Pahnihna - TNT

HMEICHHIA
2017: Champion - Power Department Sporting Club, Pahnihna - Electric Veng
2019: Champion - Durtlang, Pahnihna - Bungkawn
2022: Champion - Bethlehem Vengthlang, Pahnihna - Bungkawn