Kananin hahdam leh awlsam takin Thawhlehni tlaiah 3-0-in Bungkawn an hneh a, Tata SK 712 Pro Volleyball League table chung berah an kir leh.

R Dengthuama Indoor Stadium, Mualpuiah Kananin point 15-a san fal lai an nei a, mi mal langsar bik awm lovin 25-14, 25-16, 25-20-in an chak.

Tihsual nei tlem, Lalramliani’n vawi riat vaw tlain point khat a hloh a, a zawna D3 Business Player of the Match-a thlan a nih laiin a kawppui, R Laltleipuii’n point 13 hlawh chhuakin tum sarih a tisual.

Inring tawn tlangin Kanan player-ten team tan awmze nei thamin an khel hlawm a, awlsam taka set khatna an lak hnuah 18-3 leh 22-7-in an kal fal.

Semifinal lut sa tawh ve vein an inkhel a, Bungkawn tan F Lalparmawii’n point 12 hmuin vawi riat a hloh a, set thumna tir lamah 8-5-in an sang a, an tawn san lai ber a ni.

Thiamna nei tam leh theihna nei sang zawk, Kanan tan engkim a awlsam a, 13-13 a nih hnuah el phak lovin an tlang.

An chak theih nan Lalbiakngheti leh B Tlangmawii Varte chuan point riat an hmuh zatve ve ve an hloh laiin, Bungkawn player zingah F-i bak an hloh aia tam point thawk chhuak an awm lo.

Season kal mekah title pahnih vaw chhuak tawh, Kananin trophy pathum an thlir mek a, a vawi khat nan Pro Volleyball champion nih tumin bu an khuar thuk zel.

Vawi li an khelh tawh ve veah Luangmual nen chak dun vek chungin Kanan an sang zawk a, Ningani tlaiah league khar nan an intawng dawn a, an pahnih inkara chungnung zawk tihfelna hmasa a ni nghal ang.

Bungkawnin league khel zo tawhin palina ni chungin an tlang a, semifinal-ah Kanan leh Luangmual inkhela chak zawk an hmachhawn dawn a ni.

Stats:
KANAN:
Lalramliani: point hmuh - 8, point hloh - 1
R Laltleipuii: point hmuh - 13, point hloh - 7
Lalbiakngheti: point hmuh - 8, point hloh - 4
B Tlangmawii Varte: point hmuh - 8, point hloh - 4
Biakthankimi: point hmuh - 3, point hloh - 3
Lalhriatpuii: point hmuh - 2, point hloh - 3

BUNGKAWN:
F Lalparmawii: point hmuh - 12, point hloh - 8
Lalhmingtani: point hmuh - 3, point hloh - 3
RK Lalfakmawii: point hmuh - 2, point hloh - 6
PC Lalrinpuii: point hmuh - 3, point hloh - 8
R Zorempuii: point hmuh - 3, point hloh - 8

POINT TABLE:
1. Kanan: Play 4, Won 4, Loss 0 - Point 12
2. Luangmual: Play 4, Won 4, Loss 0 - Point 12
3. Bethlehem Vengthlang: Play 5, Won 3, Loss 2 - Point 9
4. Bungkawn: Play 5, Won 2, Loss 3 - Point 5
5. Power Department SC: Play 4, Won 0, Loss 4 - Point 1
6. Durtlang: Play 4, Won 0, Loss 4 - Point 0

FIXTURE:
JUNE 20 (THAWHLEHNI):
08:00 pm: Tuipuiral v Durtlang North (mipa)

JUNE 21 (NILAINI):
03:30 pm: Durtlang v Power Department Sporting Club (hmeichhia)
08:00 pm: TNT v Hunthar (mipa)

JUNE 22 (NINGANI):
03:30 pm: Luangmual v Kanan (hmeichhia)
08:00 pm: Tuichangral v Tuipuiral (mipa)