Nipa Barad leh Lalmuanpuii’n point 55 thawk chhuakin Luangmual tan kawng a awlsam a, Ningani tlai Pro Volleyball League-ah 3-1-in an elpui ber, Kanan an hneh.

League-a sang ber nih inchuhin R Dengthuama Indoor Stadium, Mualpuiah an inkhel a. Set khatna an hloh hnuah 23-25, 25-17, 25-12, 25-13-in Luangmual an chak.

Gujarat tleirawl, Nipa chuan point 38 hmuin 12 a hloh a, D3 Business Player of the Match lawmman dawngin a kawppui, 2019 Pro Volleyball player tha ber Muani’n vawi 17 vaw tlain tum nga a tisual.

Pro Volleyball-a an tel hmasak berah Luangmualin derthawng lovin an elpui team nga an hneh vek a. Inrinni zanah set hloh lova an hneh tawh leh league-a palina, Bungkawn nen semifinal an khel ang.

Tun season-a trophy pahnih la tawh, Kananin lungthu kim chunga kum khar an tumna leh a vawi khat nan Pro Volleyball champion nih an tumna a tla hniam ve thung a; June 26, Thawhtanni zanah champion lai, Bethlehem Vengthlang nen final luh an inchuh dawn a ni.

League khelh li chak zawn ve ve chungin kai thar, Luangmual nen an intawng a, a tirah Lalramliani leh R Laltleipuii’n team tanpuiin inhnehtawk taka an inum hnuah 25-23-in an tlang.

Set an hloh hnuah Luangmual an insiam rem a, kum 18 mi, Nipa leh Muani bakah awmze neiin Hmingthazuali a inlan a, inkhel an awpbet zui hneh hle a. An ball vuak a nain a dik zawk bakah an kutthlak a inthlau a, net bulah hlauhawm bawkin Kanan player-ten an el zui pha lo.

Tleipuii’n point kua hmu mah se tum li a tisual a, Kanan tan mi mala thawh hlawh ber niin Rami’n tum sarih a vuak tlak laiin point ruk a paih a. Tum dang angin thiamna tha an lantir thei lo va, hmasawn mamawhin khelmual an chhuahsan.

Stats:
LUANGMUAL:
Nipa Barad: point hmuh - 38, point hloh - 12
Lalmuanpuii: point hmuh - 17, point hloh - 5
Hmingthazuali: point hmuh - 7, point hloh - 3
R Malsawmtluangi: point hmuh -1, point hloh - 6

KANAN:
R Laltleipuii: point hmuh - 9, point hloh - 4
Lalramliani: point hmuh - 7, point hloh - 6
Lalhriatpuii: point hmuh - 6, point hloh - 6
Lalbiakngheti: point hmuh - 5, point hloh - 4
B Tlangmawii Varte: point hmuh - 3, point hloh - 9

POINT TABLE:
1. Luangmual: Play 5, Won 5, Loss 0 - Point 15
2. Kanan: Play 5, Won 4, Loss 1 - Point 12
3. Bethlehem Vengthlang: Play 5, Won 3, Loss 2 - Point 9
4. Bungkawn: Play 5, Won 2, Loss 3 - Point 5
5. Power Department SC: Play 5, Won 1, Loss 4 - Point 4
6. Durtlang: Play 5, Won 0, Loss 5 - Point 0

FIXTURE:
JUNE 22 (NINGANI):
08:00 pm: Tuichangral v Tuipuiral (mipa)

JUNE 23 (ZIRTAWPNI):
08:00 pm: Chhinga Veng Spikers v Hunthar (mipa)

JUNE 24 (INRINNI):
SEMIFINAL:
08:00 pm: Luangmual v Bungkawn (hmeichhia)

JUNE 26 (THAWHTANNI):
SEMIFINAL:
08:00 pm: Kanan v Bethlehem Vengthlang (hmeichhia)