Luangmualin an tum ram hnaih zelin Inrinni tlai Tata SK 712 Pro Volleyball League-ah 3-0-in Durtlang an hneh a, vawi li chak zawnin table chung berah an inhung chhuak a. A chhe berah pahnihna tal an ni tawh dawn.

R Dengthuama Indoor Stadium, Mualpuiah awlsam taka set hnih an lak zawn hnuah team inthlau an nihna lantir zuiin, 25-8, 25-9, 25-17-in Luangmual an chak.

2019-a Durtlang champion-pui tawh, Lalmuanpuii’n a club hlui lakah tum hnih tisualin point 12 a hlawh chhuak a, D3 Business Player of the Match lawmman a dawng a. A kawppui, Nipa Barad chuan vawi 20 vaw tlain point ruk a hloh a, Durtlang player-ten an el pha lo.

Kai thar, Luangmualin Pro Volleyball an khelh hmasak berah team dang tan ralkhel dar an khawng ri ring telh telh a. Chiang taka set khatna an lak hnuah 16-9-a hma an hruai zui laiin Zoliansangi’n a service a, point kua hmu zawnin an tlang.

Durtlangin reilo te chung dinhmun tha luahin set thumna tir lamah Lalpekhlui’n tha pangngai takin a vaw tla a, 6-1-in an sang zawk a; mahse, an innghahna ber, Peki’n an inkhelh chhungin point sarih a hmuh let 14 a hloh a ni.

Luangmualin an nawr let hnuah kum lam naupang rual awm khawmna, Durtlang an bet zui leh nghal a, league kal mekah vawi li tlawm zawnin semifinal lut pha lovin an tla dawn tih a chiang nghal a. Chhiatna dang, kum li kal taa an champion hnuah chak ni hmel hmu lovin Pro Volleyball khelh sarih an tlawm zawnna a ni bawk.

Khelh khat la nei mah se a sang pahnih zingah Luangmual an tel dawn tih a chiang ve thung a, anni aia vawi khata khel tlem, Kanan aiin point thumin an sang a. Ningani hian tun season-a trophy pahnih la tawh leh an elpui ber, Kanan nen intawngin league an khar dawn a ni.

Stats:
LUANGMUAL:
Nipa Barad: point hmuh - 20, point hloh - 6
Lalmuanpuii: point hmuh - 12, point hloh - 2
Hmingṭhazuali: point hmuh - 7, point hloh - 3
R Malsawmtluangi: point hmuh - 5, point hloh - 1
Zoliansangi: point hmuh - 5, point hloh - 2

DURTLANG:
Lalpekhluii: point hmuh - 7, point hloh - 14
Emily Lalramsangi: point hmuh - 1, point hloh - 4
Lalrinthangi: point hmuh - 1, point hloh - 3
Vansangpuii: point hmuh - 1, point hloh - 1
Lallawmawmi: point hmuh - 1, point hloh - 1

POINT TABLE:
1. Luangmual: Play 4, Won 4, Loss 0 - Point 12
2. Kanan: Play 3, Won 3, Loss 0 - Point 9
3. Bethlehem Vengthlang: Play 4, Won 2, Loss 2 - Point 6
4. Bungkawn: Play 4, Won 2, Loss 2 - Point 5
5. Power Department SC: Play 3, Won 0, Loss 3 - Point 1
6. Durtlang: Play 4, Won 0, Loss 4 - Point 0

FIXTURE:
JUNE 17 (INRINNI):
08:00 pm: Hunthar v Tuipuiral (mipa)

JUNE 19 (THAWHTANNI):
03:30 pm: Power Dept Sporting Club v Bethlehem Vengthlang (hmeichhia)
08:00 pm: Tuichangral v Chhinga Veng Spikers (mipa)