Tata SK 712 Pro Volleyball League an khelh hnuhnun berah Power Department Sporting Club an chak a, Nilaini tlaiah tlaiah set thum faiin Durtlang an hneh. Anni pahnih hi semifinal beisei phak tawh lo ve ve an ni.

R Dengthuama Indoor Stadium, Mualpuiah team pahnih tan semifinal luhna kawng a inhawng tawh lo va, Power player-ten thawh hona tha tak lantirin 25-8, 25-18, 25-22-in an chak.

Lalrammawii’n point kua hmuin tum li a hloh a, a vawi khat nan D3 Business Player of the Match-a thlan a ni a. Ani bakah Lalfakzuali leh Angeli Lalhriatchhungi’n point hnih hlohin vawi nga ve ve an vaw tla a, Vardingliani’n point li thawk chhuakin vawi khat a tisual.

2017 Pro Volleyball hmeichhe champion hmasa ber, Power-in eng emaw chen team an tinung zui lo va, hranghlui leh inkhelh chawlhsan tawh ko kirin Mizorama inelna sang berah an tel thar leh a, an beisei ang ni lo mah se a tawpah nuam ti takin khelmual an chhuahsan.

Harsa lova set hnih an lak zawn hnuah Angeli chuan vaw tlain 24-17-in an sang a; player naupang rual awm khawmna, Durtlangin point nga hmu zawnin dal tum viau mah se an dang tluan zo lo.

Kum thar thlirin Durtlangin kum lama la naupang, tleirawl tak tak tan inelna sangah hun tha an siamsak a; chutih laiin nikum ang bawkin harsatna an tawk leh a,  2019 Pro Volleyball champion an nih hnua vawi riat an khelhah an tlawm vek a ni.

Melody Lalrintluangi’n point nga hlawh chhuakin tum hnih a hloh a, an innghahna ber, Lalpekhlui’n vawi 10 vaw tla chungin point 12 a paih.

Vawi nga an khelhah point khat mah hmu lovin Durtlang an tla a, an chung chhiaha awm Power-in point li hlawh chhuakin tum khat an chak ve thung.

Ningani tlaiah a sang pahnih, Kanan leh Luangmualin pakhatna nih an inchuh dawn a, hmeichhe league khelh zawh a ni ang.

Stats:
POWER:
Lalrammawii: point hmuh - 9, point hloh - 4
Lalfakzuali: point hmuh - 5, point hloh - 2
Angeli Lalhriatchhungi: point hmuh - 5, point hloh - 2
Vardingliani: point hmuh - 4, point hloh - 1
FP Lalduhkimi: point hmuh - 3, point hloh - 1
Vanlalremruati: point hmuh - 3, point hloh - 2
Lalchhandami: point hmuh - 2, point hloh - 4
Linda K Hmingthangi: point hmuh - 5, point hloh - 7

DURTLANG:
Melody Lalrintluangi: point hmuh - 5, point hloh - 2
Lalpekhluii: point hmuh - 10, point hloh - 12
Emily Lalramsangi: point hmuh - 2, point hloh - 4
Vansangpuii: point hmuh - 2, point hloh - 6
Lalrinthangi: point hmuh - 2, point hloh - 7
Lallawmawmi: point hmuh - 0, point hloh - 2
Zodingpuii: point hmuh - 2, point hloh - 0

POINT TABLE:
1. Kanan: Play 4, Won 4, Loss 0 - Point 12
2. Luangmual: Play 4, Won 4, Loss 0 - Point 12
3. Bethlehem Vengthlang: Play 5, Won 3, Loss 2 - Point 9
4. Bungkawn: Play 5, Won 2, Loss 3 - Point 5
5. Power Department SC: Play 5, Won 1, Loss 4 - Point 4
6. Durtlang: Play 5, Won 0, Loss 5 - Point 0

FIXTURE:
JUNE 20 (NILAINI):
08:00 pm: TNT v Hunthar (mipa)

JUNE 22 (NINGANI):
03:30 pm: Luangmual v Kanan (hmeichhia)
08:00 pm: Tuichangral v Tuipuiral (mipa)

JUNE 23 (ZIRTAWPNI):
08:00 pm: Chhinga Veng Spikers v Hunthar (mipa)