Set an hloh hmasak hnuah Tuichangchal hnehin Huntharin lungthu an kim a, zirtawpni zan khan Ather Pro Volleyball League-ah an champion. LPS Arena, Falkland-ah 12-7-a sang zawk ni chungin Huntharin set hmasa ber an hloh a, final boruak sangah paukhauh leh zuala inlanin 23-25, 25-23, 25-23, 25-23-in an chak. Champion-na point thawk chhuaktu Anurag Rawat chuan vawi 36 vaw tlain point 11 a hloh a, a vawi nga nan Kuriz Player of the Match-a thlan a ni. Set hnihna leh thumnaa point pawimawh hmutu Fabian Lallunghnema'n tum 11 vaw tlain point nga a hloh. Set li an khelh chhungin deuce ngai lova point hniha inthlau vekin an ching fel a; set hnihna atangin Huntharin inthlau si lova danglamna an thlentir a, set linaah 18-14-a sang tawh Tuichangral pawtthlain kum ruk hnuah a vawi khat nan trophy an la. Lehlam vuak dang tura net bula zuang taima Lalnunfela'n fel fai leh hlawk takin a khel a, point hloh nei lovin 10 a hlawh chhuak. Pro Volleyball chanchinah Tuichangral nen tum sarih an intawnna a ni a, vawi ruk an hneh zawnna a ni nghal. Season liam ta khan Thutak Nunpuitu Team nen set nga inkhelin uiawm takin Hunthar an tlawm a, final-a an chak loh hmasak ber a ni a, 2023-24 season chhunga Pro Division inelna hmasa MVA Cup-ah final lut pha lovin an tla zui leh bawk. Coach VL Malsawma Renthlei hovin awmze neiin an intuai thar a, Delhi tlangval Anurag la lutin Pro Volleyball final-a an inlan vawi lina niin a tum thum nan an chak mai bakah, champion phu ber ni chungin tum sarih an khelhah chak fai vekin set hnih chiah an hloh. Tuichangralin an tum ram thleng tura an tawn san lai ber hmangin semifinal-ah an sal tanna pakhat atangin an chhuak. Inelna hrang hranga vawi ruk an hneh loh zawn hman TNT lakah set thum faiin an chak a, player-ten khai rual takin hma an sawn. Pro Volleyball-a an tel hmasak ber 2018-ah final lut nghalin league-a set thum set hniha an hneh tawh Hunthar lakah set la lovin an tlawm. Tun tumah a vawi hnih nan final lutin league-a set thum faia an hneh loh tawh Hunthar nen bawk an inhmachhawn leh. Semifinal atanga che tha Zomuansanga'n vawi hnih chiah tisualin tum 26 a hlap tla a, Sonu chuan point 26 hmuin 15 a paih bakah Saidingpuia Sailo chuan vawi 19 vaw tlain point li a hloh laiin Vanlaltanpuia'n point khat hlohin point kua a hmu a, chuti chungin Aizawl pawn atanga champion hmasa ber nih an tumna an puitlin lo. League chhunga thawh hlawk Lalbiakmuana'n semifinal-ah a kutzungtang tinain a khel zui thei lo va, chuti chungin Hunthar laka an harsatna su kiang turin set khatnaah anmahni tantute an chawk phur a, point lia hniam zawk an nih hnuah season liam taa Hunthar player langsar Zomuana'n vaw tlain 15-15-in an nih rual. Inum chhovin Sonu chuan a hlap tlak rualin 24-23-in Tuichangral an sang. Point khat hmuh belha set la thei tura hun tha an neih tihlawhtling nghalin Huntharin service an la fuh lo va, Saitea'n hui tlain Arena chhung khat tlata mipui pung khawm atangin hlim thawm a ri ring hle. Set hnihnaah inhnehtawk leh zualin an innih rual chho zel a, 16-16 atangin Hunthar an kal hma hret a, Anurag chuan vaw tla zawnin 21-18-in an kalsan. Fabian-a'n a hlap tlak ve leh hnuah point lia inthlau chungin Huntharin set la turin point khat chiah an duh belh. Zomuana'n vaw tla zawnin Tuichangralin hnaih leh hman mah se Kolasib tlangval Fabian-a vuak an la thei lo va, Huntharin set an hlohna 25-23 chiahin an chhang let ve nghal a, inrintawk an insiam belh bawk. Boruak sang leh inelna nasaa tawn hriat ngah zawk Huntharin hun pawimawhah danglamna an thlentir zui leh a, 23-23 a nih laiin Fela'n rang takin a vaw tla a, khaw chhak team-in nih rual thei tura hun tha an neih an tizuzi a, Fabian-a'n remchang neih phahin na taka a hlap an la thei lo. Tuichangal tan chet sual a thiang tawh lo va, set lina laihawl thlengin beiseiawm takin an nawr let a, Zomuana leh Sonu chuan point hmu zawnin 18-14-in an sang. A hmain dik tawk lovin Huntharin point an hloh a, thinrim takin coach Sawma'n inkhel thununtute a hmachhawn a, an khel a chiri phah bawk. Mahse, Huntharin nungchang ropui lantirin a tlai chhiat hmain an insiam tha a, setter Remsangzuala'n a hui tlak hnuah Tuichangralin C Lalhriatpuia service an la thei lo va, 18-18-in an nih rual. Tuichangral kal hma nawn lehin Saitea'n a vuak hnuah Fabian-a hlap dang tlain 21-19-in an sang leh. Hun harsaah Anurag chuan Hunthar a hruai kir a, ball tha lo pawh vaw tla thei zelin an dang thei lo va, chet fuh hunah Tuichangral talbuai ve thungin point nga an hloh zawn avangin 24-21-in lehlam an sang a, kir leh turin a harsa lutuk tawh. Zomuana'n point khat hmuh belhin Anurag chuan a vaw kai lo bawk a, mahse, 24-23 a nih laiin Delhi tlangval hian lehlam ban pharna chung atangin a hlap tla a; tum khat aia tam champion thei awm chhun Huntharin a vawi thum nan trophy an la. Nikumah hriat hlawh lo player awm khawmna Tuipuiral tan filawr takin feet 6 leh inchi 5-a sang Anurag inlan mah se an thleng san zo lo. Kuminah team tha Hunthar tan vawi sarih a khelhah point 188 hlawhin 95 a hloh a, team-in point 93 an hlep thei. Hunthar an champion tawh vawi thuma tel kim vek captain Remsangzuala chu a tum thum nan KT Enterprise Best Setter-a thlan a ni. Anurag tih loha point thawh hlawk Fabian-a'n vawi 96 hlap tlain tum 30 a tisual a, chawimawina ngaihlut hlawh KT Enterprise Mizo Best Player lawmman Panasonic Smart TV a dawng. Final-a vawi hnih an inlan tawhah Hunthar hneh lo ve vein Tuichangral an tlawm a, chutih laiin mi mal chawimawina dawng hnem ber an ni ve thung. Khawhai tlangval Zomuana'n vawi 102 vaw tlain 37 a paih a, KT Enterprise Best Spiker-a thlan a ni. Kum ruk hnua final luhpuitu David Aizampuia Fanai chuan KT Enterprise Best Coach chawimawina dawngin, libero atana a hman Lalrinmgheta chuan KT Enterprise Best Reiceiver lawmman a la a; TNT player Zosangzuala chu kum zawnin KT Enterprise Best Blocker atan thlan a ni ve thung. STATS TUICHANGRAL Zomuansanga : point hmuh 26, point hloh 2 Sonu : point hmuh 26, point hloh 15 Saidingpuia Sailo : point hmuh 19, point hloh 4 Vanlalṭanpuia : point hmuh 9, point hloh 1 Lalhmunmawia : point hmuh 4, point hloh 5 C Zonunmawia (setter) : point hmuh 1, point hloh 5 HUNTHAR Anurag Rawat : point hmuh 36, point hloh 11 Fabian Lallunghnema : point hmuh 11, point hloh 5 C Lalhriatpuia : point hmuh 5, point hloh 4 Lalnunfela : point hmuh 10, point hloh 0 Wilson Lalremruata : point hmuh 3, point hloh 1 Remsangzuala (setter) : point hmuh 3, point hloh 2 MI MAL CHAWIMAWINA : KT Enterprise Best Spiker - Zomuansanga (Tuichangral) KT Enterprise Best Blocker - Zosangzuala (TNT) KT Enterprise Best Setter - Remsangzuala (Hunthar) KT Enterprise Best Reiceiver - Lalrinmgheta (Tuichangral) KT Enterprise Best Coach - David Aizampuia Fanai (Tuichangral) KT Enterprise Mizo Best Player - Fabian Lallunghnema (Hunthar) PRO VOLLEYBALL LEAGUE MIPA CHAMPION 2016 - Anastasia Electric Veng 2017 - Hunthar 2018 - Hunthar 2019 - Chhinga Veng Spikers 2022 - Durtlang North 2023 - Thutak Nunpuitu Team 2024 - Hunthar