Pro Volleyball: A vawi khat nan Serkawn an chak

A vawi khat nan Serkawn an chak a, thawhṭanni zan Ather Pro Volleyball League-ah Durtlang harsatna tipungin set nga faiin an hneh.

LPS Arena, Falkland-ah R Laltleipuii (Tetei) leh Elisian Medai chuan Lunglei team tan point 28 an thawk chhuak a, 15-7, 15-13, 15-5, 15-12, 15-6-in an chak.

League bul an ṭannaah set khat mah la lovin anni ang bawka kai thar Diakkawn lakah Serkawn an tlawm nghal. Durtlang hmaah kawng dikah kirin captain Tetei'n point 15 hmuin ṭum nga a tisual a, Kuriz Player of the Match-a thlan a ni.

Durtlangin nikum khan hma lam hun thlir chungin player naupang rual an chhawr a, chak an nei lo. Kuminah an player-te an la puitling tawk lo va, tawn hriat nei leh fa nei tawh Lalramengi Ralte hovin khel mah se kum nga chhunga a vawi khat nan Pro Volleyball inkhela chak an tumna an puitlin thei lo.

2019 final-ah Bungkawn hnehin Durtlang an champion a, hemi hnu hian chak an nei zui tawh lo. 2022-ah vawi thum khelin 2023-ah ṭum nga an inlan a, khelh kua an tlawm zawnna a ni.

Diakkawn nen an inkhelh ṭumin Serkawn player-te an ngampa tawk lo va, Durtlang hmaah inringtawk takin bul an ṭan a, Tetei'n a vuak tlak rualin set hmasa berah 10-7-in hma an hruai a, point nga hmu zawn zuiin an tlang.

Durtlang tan Sarah Lalsuiengi chuan vawi nga tisualin point kua a hmu a, mi mala thawh hlawk ber niin set hnihnaah team tan beiseina a siamsak a, a vuak tlak hnuah 13-12-in an sang. Mahse, ball hlap tla tura danglamna siam thei player an tlachham a, an tuar.

Set la tura point hnih an la mamawh laiin Lalrampani'n ṭum hnih a vaw sual zawn a, Emily Lalramsangi'n line pawnah hlap chhuak bawkin hun pawimawhah harsatna an tawk a, anmahni tisual vangin Serkawnin set an la zawn.

Lunglei team-in derthawng zui tawh lovin inkhel an thunun tluan a, a ṭha thei ang berin league point nga an hmu. Elisian chuan tum 13 vaw tlain point sarih paih mah se Tetei nen team an chawi kang a, Evelyn Malsawmtluangi'n point ruk a thawh chhuah chanve a hloh bawk.

Durtlang hmabak a hautak dawn a, Sarah-i bakah Maengi'n ṭum nga hlap tlain vawi thum a tisual a, anni pahnih bak hlawkpui thama khel an awm lo. An el theih tur team lakah set an la lo va, kar leh thawhtanni zanah an khel leh dawn a, champion lai Luangmual nen an intawng ang.

Serkawnin semifinal beiseina an insiam ve thung. May 10-ah an inlan leh chauh dawn a, title humhim thei tura rin hlawh Luangmual hmaah fiahna leh chona nasa zawk an hmachhawn dawn a ni.

STATS

SERKAWN

R Laltleipuii : point hmuh 15, point hloh 5

Elisian Medai : point hmuh 13, point hloh 7

Angeli Lalhriatchhungi : point hmuh 2, point hloh 1

Evelyn Malsawmtluangi : point hmuh 6, point hloh 3

Elina B Lalenkawli : point hmuh 3, point hloh 3

DURTLANG

Sarah Lalsuiengi : point hmuh 9, point hloh 5

Lalramengi Ralte : point hmuh 5, point hloh 3

Lalrampani : point hmuh 3, point hloh 8

Emily Lalramsangi : point hmuh 2, point hloh 5