ZALEN, May 14, 2025: Set an hloh hmasak hnuah a zawna vawi thum champion thei turin Luangmual an insiam rem a, Thawhlehni zan EverHome Pro Volleyball League hmeichhe inkhel hmasa berah set li set khatin Bungkawn an hneh.

LPS Arena, Falkland-ah Rithegaa G leh Bungkawn spiker Elisian Medai an inel tawk hle a, Luangmual captain Lalramliana’n hun pawimawhah team fuih phur ve thungin 11-15, 15-12, 15-12, 17-15, 15-5-in champion lai an chak.

March 13 khan MVA Cup final-ah Luangmualin set hmasa pahnih an hloh hnuah Bungkawn an hneh a, Pro Volleyball atan Tamil Nadu atangin feet 5 leh inchi 6-a sang University player Rithegaa an la lut a. Ani hian Mizo leilunga a inkhel hmasak berah vawi 22 vaw tlain point sarih a hloh a, Bungkawn player pawimawh, Elisian chuan point 22 tho hmuin tum riat a tisual ve thung a ni.

2024 Pro Volleyball best spiker Rami’n point 11 hmuin point thum a hloh a, mi mala hmu tam ber ni lo mah se net bula lehlam ball vuak dangtu leh team boruak chawi kangtu ber a ni a, Kuriz Player of the Match-a thlan a ni.

Luangmual tan tun hnaia hmasawn, Remlalnghaki’n point ruk a hmuh chanve tisualin, Lalbiakngheti’n vawi nga hlap tlain point hnih a paih bawk.

An intawn hnuhnun ber ang bawkin Bungkawnin harsatna an tawk leh a, a tir lamah nung takin khel mah se set hnihna atangin an tlo tawk lo va. Set thumnaah 6-2, set linaah point khat hmu belha tlang thei turin hun tha vawi hnih nei mah se, a tawp set li an hloh zawn.

Elisian thlawptu, F Lalparmawii’n point 12 hmuin point riat a hloh a, set lina atangin chet a harsat a. Luangmual angin Bungkawnin point hmu mai thei player an ngah tawk lo a, a tawp lamah Lalchhandami’n point li a hmuh chanve a hloh na a, awmzia a nei zo lo a ni.

Hmeichhe team pathum an inel a, league an khelh chhungin point 15 game hmangin set nga zel an inkhel ang a. May 19 zanah league zo felin Luangmual leh team thar, Jimmy Kanan an inhmachhawn dawn a, Ningani zanah chak mamawh, Bungkawn inlan leh nghalin Jimmy Kanan nen an inkhel ang.

2019 atanga Pro Volleyball hmeichhe inelnaa la tel ziah, Bungkawnin a vawi khat nan champion tumin tun season-ah Mizo spiker tha, Elisian an la lut a, 2023 leh 2024 champion Luangmual lakah an player hlun, F-i nen set khatnaah an inthlawp tha hle.

Elisian-i’n Bungkawn point hmasa panga zinga pathum thawk chhuakin F-i’n a vuak thlak leh service hmangin a hmu zawn chho bawk a, 11-6-in an sang a. Rithegaa-i’n a ball hmuh point-ah chantir nual mah se Luangmual an insiam rem hman lo va, harsa lovin Bungkawnin set khatna an la.

Set hnihna tirah Mizo player-te aia lian bik lo, Tamil Nadu spiker-in tum li hlap tla zawnin Luangmual an fal nghal a. Bungkawnin nawr letin Rithegaa chuan tum hnih a tisual zawn a, Elisian chuan vaw tla ve thungin 7-6-in an lehpel hman.

Mahse, Luangmual an insawh nghet a, Biakngheti’n point hnih hmu zawnin Rami’n Elisian-i vuak a dansak nen point a hmu zawn a, Rithegaa chuan hlap tla bawkin 12-7-in an sang leh a. Bungkawnin an hnaih zo tawh lo va, 14-12 a nih laiin Remremi’n set an lak zawn nan a vaw tla a ni.

Set thumnaah Bungkawnin hnuhma nei thar ve lehin Elisian-i’n a hlap tlak hnuah point liin an kalsan a. Net bula zuang taima, Rami’n Luangmual hruai kirin a service hmanga point a hmuh zawn hnuah Remremi leh Biakngheti’n point an hlawh zawn a, Bungkawn spiker F-i’n vaw sual ve lehin 12-8-in an lehpel a, set hnihnaa an chakna zat ang chiahin an tlang leh.

Set linaah an inum tawk hle a, 13-13 a nih lain Elisian-i’n a vaw tla a. Lalrampani’n a service sual avangin Bungkawnin set an lak theihna hun tha an hloh hnuah Elisian chuan vaw tla lehin 15-14-in an sang leh.

Inelna sangha point hloha set hloh thei, Luangmual an hriam a, Rithegaa chuan an vuak tlak hnuah Elisian chuan a tisual zui a, Remremi’n set thum an lak zawnna point thawk chhuakin a awlah na lovin a hlap tla a ni.

A tawp thlengin Luangmualin mar takin an khel a, set hnuhnung bera lut setter FVL Hmuchhuaki leh Lalruatmawii’n point an hmuh zawn hnuah Rami’n Elisian-i vuak a dang a, 12-4-in an kal fal a. Set lina an hloh rualin Bungkawn an hnual a, set nganaah point nga chiah an thawk chhuak ve hman a ni.

EVERHOME PRO VOLLEYBALL LEAGUE 2025 @ LPS Arena, Falkland

LEAGUE ROUND 1 : RESULT

May 13 (Thawhlehni) Zan

Luangmual def Bungkawn (hmeichhia)

= 11-15, 15-12, 15-12, 17-15, 15-5 (4-1)

Kuriz Player of the Match

= Lalramliani (Luangmual)

STATS

LUANGMUAL

Lalramliani: point hmuh 11, point hloh 3

Rithegaa G: point hmuh 22, point hloh 7

Remlalnghaki: point hmuh 6, point hloh 3

Lalbiakngheti: point hmuh 5, point hloh 2

B Tlangmawii Varte: point hmuh 2, point hloh 1

BUNGKAWN

Elisian Medai: point hmuh 22, point hloh 8

F Lalparmawii: point hmuh 12, point hloh 7

Lalchhandami: point hmuh 4, point hloh 2

RK Lalfakmawii: point hmuh 2, point hloh 2

Chinglunkimi: point hmuh 1, point hloh 2

Lalrampani: point hmuh 1, point hloh 2

Melody Lallawmkimi (setter): point hmuh 0, point hloh 2

FIXTURE

MAY 14, 2025 (NILAINI) - 8:00 PM

Anastasia Electric Veng v Hunthar (mipa)

MAY 15, 2025 (NINGANI) - 8:00 PM

Bungkawn v Jimmy Kanan (hmeichhia)

MAY 16, 2025 (ZIRTAWPNI) - 8:00 PM

Khawbel v Thutak Nunpuitu Team (mipa)

MAY 17, 2025 (INRINNI) - 8:00 PM

Tuichangral v Sihphir (mipa)

MAY 19, 2025 (THAWHTANNI) - 8:00 PM

Jimmy Kanan v Luangmual (hmeichhia)