ZALEN, Apr. 04, 2025: Anastasia Electric Vengin awlsam takin Dinthar an hneh a, playoff khelh hnihah chak zawnin Hunthar nen 2025 Pro Volleyball League mipa inelnaa tel turin an tling.

Team pathumin hmun ruak pahnih an inchuh a, Nilaini khan 3-1-in Hunthar lakah Anastasia an chak tawh a, Ninganiaah Tuikual Indoor Stadium, Aizawlah set thum la tlang nghalin 25-8,25-11,25-13-in Dinthar an hneh.

Pro Volleyball hmasa ber, 2015-16 champion Anastasia hian inrelbawlna lamah harsatna an tawh avangin 2016-2017-ah club an tinung zui lo va. 2018-19 khan Pro Volleyball-ah kir lehin an thleng sang lo va, tun tum playoff-ah an elpui team pahnih hneh ve vein Mizoram inelna sang berah an tel leh dawn a ni.

Dintharin a hmain 3-1-in Hunthar an hneh lo va, tlang thei turin Electric Veng team lakah set hloh lova chak an mamawh laiin a vawi khat nan Pro Volleyball khelh an tumna an puitlin zo ta lo a ni.

Huntharin title humhim turin hun tha an nei thei dawn ve thung a, Dinthar an chak loh rualin Pro Volleyball-a tel turin an tling a. Season liam ta khan Huntharin final-ah Tuichangral an hneh a, a vawi thum nan Mizoram volleyball inelna sang berah an champion a, tun season-ah club-in harsatna a tawh avangin division sang ber atangin an inhnukdawk.

Mipa Pro Division-ah team paruk awmin thla liam ta khan Lungleiah MVA Cup khelh a ni a, Durtlang North leh Chhinga Veng Spikers an tel loh avangin Pro Volleyball an khel zui thei lo.

MVA Cup champion Thutak Nunpuitu Team, MVA Invitation Cup champion Tuichangral, Khawbel leh Sihphir bakah playoff atanga tling, Anastasia leh Huntharin 2024-25 Pro Volleyball title an inchuh dawn a ni.