DOWNLOAD OUR APP

Read latest news on your phone
app-store
Pro Volleyball-ah Bungkawn nula ten Durtlang an hneh
May 15, 2022

Bungkawn hmeichhe team-in an helhkam lian tak an pal tlang a, zirtawpni zan Zothan Autoworks Pro Volleyball League-ah set thum set khatin Durtlang an hneh. R Dengṭhuama Indoor Stadium, Mualpuiah Bungkawnin set hmasa ber an hloh a, F Lalparmawii'n team chawi kangin 25-17, 25-19, 25-14-in ropui takin an kir leh.

He hnehna hi Bungkawn tan a hlu a, Durtlang nen Pro Volleyball-a an intawn lehna hmasa berah 2019 final-a an tlawmna ṭha takin an chang let a, league kal meka vawi hnih an khelh tawhah chak zawnin final luh nawn an hnaih.

Champion lai Durtlang hmabak erawh a hautak sawt hle. Kanan lakah set la lovin an tlawm tawh a, khelh khat an la neihah chak pawh ni se final lut turin set an lak dan leh team dang dinhmunah an innghat tel a, beiseina a sang tawh lo.

Bungkawn tan set thum faia Bethlehem Vengthlang an hneh tuma che ṭha F-i'n Durtlang lakah point 30 hmuin 14 a paih a, D3 Business Player of the Night-a thlan nawn niin a elpuite lakah a filawr.

Chutih laiin Durtlangin bul an ṭan fuh a, Lalramliani leh CS Zonunmawii'n awmze neiin an khel. Inel tawk viau chungin Bungkawn an insiam rem nghal mai lo va, league kal meka a vawi khat nan champion laiin set an la.

Set hnihnaah F-i'n inkhel boruak tidanglamin lehlamin tlar hma leh hnung atanga ball a vuak an chelh lo. Bungkawn player dangten inrintawkna neih phahin Durtlang an tlahniam a, set hnuhnung pathumah team leh player khaikhinin an khing zo lo tluan ṭhak a ni.

F-i bakah Bungkawn player-ten team tan ṭangkai thamin an khel a, R Malsawmtluangi'n point 12 hloh mah se 15 a hlawh a, FP Lalduhkimi'n point riat hmuin ṭum li a tisual a, Angelli Lalhriatchhungi'n point sarih thawhin point khat chauh a paih a, hlutna neiin a khel.

Durtlang player zingah Rami'n point 12 hmuin vawi ruk a tisual a, Zonuni'n point 10 a hmuh laiin point li a hloh. Anni pahnih bak hlawk thama point hlawh chhuak an awm lo va, captain Lalawmkimi Khenglawt chuan point ruk a hmuh laiin vawi sarih a tisual a ni.

Hmeichhe team paliin vawi hnih ṭheuh khel tawhin khelh khat ṭheuh an la bak a, Bungkawn sang berin tlang tluk an ni tawh.

D3 Business Player of the Match
-  F Lalparmawii (Bungkawn)

Play stats :

BUNGKAWN

F Lalparmawii : point hmuh 30, point hloh 14
R Malsawmtluangi : point hmuh 15, point hloh 12
FP Lalduhkimi : point hmuh 8, point hloh 4

DURTLANG

Lalramliani : point hmuh 12, point hloh 6
CS Zonunmawii : point hmuh 10, point hloh 4
Lalawmkimi Khenglawt : point hmuh 6, point hloh 7

FIXTURE

May 16, thawhtanni -
8pm : Chhinga Veng Spikers v Hunthar (mipa)

May 17, thawhlehni - 
8pm : Durtlang North v Tuichangral (mipa)

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh