ZALEN, May 30, 2026: Hun pawimawhah Chhinga Veng Spikers-in set thum faia an elpui Tuichangral an hneh rualin Mizoram Rural Bank Pro Volleyball League semifinal an lut deuhthaw a, table-a sang pahnih, Anastasia Electric Veng leh Hunthar an tlang.

Thawhtanni zan khan dinhmun hniama awm, Chhinga Veng an tho leh a, hmahruaitu Anastasia hnehin player an inrem fuh a, team nghet an neih phah bawk a. Intel ruh zui zelin tlak leh tlang hril thei inkhel pawimawhah Tuichangral aiin an hriam tluan a, league kal mekah a vawi khat nan set hloh lovin an chak.

Sawiselna tuar hman, Morales Ponce De Leon chuan an khelh hnuhnun vawi hnihah lei rem rap theiin team a tanpui a, Tuichangral hmaah a vawi khat nan Kuriz Player of the Match lawman a dawng a, point riat hlohin tum 22 a hlap tla.

Anastasia nen set nga an inkhelh chhungin Cuban spiker-in point 32 hmuin 13 a hloh va, Tuichangral lakah set thum chiah an mamawh ve thung a, chawhrualin Electric Veng club an hmachhawn tum aiin a che tha a, Chhinga Veng Mizo player-ten inkhairual leh rin tlak vekin an khel tel bawk a, team pum puiin hma lam an pan.

 An khelh hmasak vawi thuma hmun chang mumal lo, Lalnunzira’n Anastasia nen an intawn atangin hmun a chang nghet a, Tuichangral hmaah Vanlaltanpuia nen vawi kua ve ve vaw tlain tihsual an nei tam lo va. R Vanlalmawia leh H Malsawmsanga’n point riat leh point sarih hmuin point thum ve ve an paih a, setter C Zonunmawia’n team fuih phur tel bawkin a kut atanga ball chhuak a thunun hneh telh telh.

Vawi nga an khelh tawhah Chhinga Vengin point kua an hmu a, pathumnaah insawn chhovin June 5-ah league khar nan Hunthar nen an inkhel ang a. Semifinal tichiang turin set khat an la mamawh a, chutih rualin anni aiin an elpui team dangin league an khar hma dawn a, an dinhmun azirin set lak belh tawh lo pawhin knockout round luh theih dan a awm.

Final-a vawi hnih inlan tawh, Tuichangral tan a vawi khat nan champion an tumna a tawp hnai ve thung a. Set hmasa ber tawp lamah Sri Lanka atanga an lak luh, Mahela Indeewar chuan a ke a tina a, a khel zawm thei lo va. Chak a tulzia hre chungin an inbuatsaih lawk a, Chhinga Veng nen an inkhelh hmain nikuma semifinal luhpuitu, Rajneesh Singh an ko kir a, Mahela thlakin set khatna tawp lam atangin khel tluan mah se a langsar zo lo.

Nilaini zan khan Tuichangralin set thum set khatin Hunthar an hneh lo va, insiam that an mamawh laiin an hnungtawlh a, chiang leh zualin Spikers lakah an tlawm leh a. Hnuhma nei lian ber, Saidingpuia Sailo chuan tum 16 vaw tlain vawi nga a tisual a, Uttar Pradesh atanga an lak luh, Rajneesh chuan point 12 hmuin point li a hloh a, a inkhelh chhungin Mahela chuan vawi ruk vaw tlain point li tho a paih a, a che ropui bik chuang lo.

Panganaah Tuichangral awmin an neih sa point ruk bak an hmuh belh loh bakah set an lak belh lo a, point 11 kawl mek, Anastasia leh point 10 hmu tawh, Huntharin palina chin luah chungin league an zo dawn tih a chiang nghal a ni.

Khaw chhak team hmabak thim zui viau mah se palina, Khawbel aiin point hnihin an hniam a, engkim a la tawp vek lo va. Thawhlehniah Khawbelin tla chiang tawh leh a mawnga awm, Thutak Nunpuitu Team hmachhawnin, a tuk zanah Tuichangralin anni aia point khata hniam, Sihphir khelhpuiin league an zo ve thung dawn a, Sihphir tan pawh thil mak a la thleng thei.

Pro Volleyball League chanchinah Tuichangralin fiahna tling inkhelah beisei pha lovin harsatna an tawk tawh thin a, chu anchhia chuan Chhinga Veng hmaah a kiansan lo va. Set hmasa berah beiseiawm takin 23-19-a an sang tawh an inpawhtlaktir a. 21-19-a sang zawk an nih laiin Mahela chuan a vaw tla zo lo va, a tlaknaah a ke rap lekin a che zui thei lo.

Spikers tan point hmuh theihna hun tha a nih laiin referee Lalmuanpuia’n common ball hamin a titawp a, Chhinga Veng an lungawi lo hle.

A hnuah Saitea leh setter H Lalramdinmawia ten point hmu zawnin point liin lehlam an kalsan a, set lak nan point hnih chiah an mamawh tawh a. Chhinga Vengin nawr letin an dang bet a, point ruk hmu zawnin set an lak khalh a, Morales chuan point nga hlawh chhuakin Mahela thlaktu, Rajneesh chuan point a hloh bakah a vaw tla thei lo.

Set hnihnaah an hlap tlak theih mai loh avangin Tuichangral an talbuai a, 20-13-in an hniam hman a. Awlsam taka tlang mai tura ngaih an nih hnuah Chhinga Vengin insawrbingna an hloh then ve leh a, Morales chuan point hloh zawn chhovin ho takin an lamah ball an tlaktir bawk a, Tuichangral tan Rajneesh chuan a hma leh hnung atangin a vaw tla a, 22-23-in an hnaih chilh hman a. A tlai chhiat hmain Morales chuan boruak rit vai kiangin a vaw tla a, Rajneesh-a hlap dang zui lehin point a hmu zawn a, set an la zawn.

Set thumnaah inthlahdah lovin Chhinga Vengin a hma aia marin hma lam an pan a, inring tawnin nuam ti takin an khel a. Point a san hnuah Tuichangralin an el zo lo tial tial a, Tpa’n hui tlain Zira leh Mawite ten an vaw tla thei bawk a, 24-18 a nih laiin Morales-a hlap dansak mah se Rajneesh chuan a service kai lo zui a, beisei pha lo takin Tuichangral an tlawm.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT: Round 5 - May 29, 2026 (Zirtawpni)

Chhinga Veng Spikers def Tuichangral (mipa)

25-23, 25-22, 25-19 (3-0)

Kuriz Player of the Match - Morales Ponce De Leon (Chhinga Veng Spikers)

Cheetak Fan of the Night - Lalhruaitluangi (Tuichangral)

MVA Lucky Fan - Deborah Lalhriatrengi (Tuichangral), Baby Lalparmawii (Chhinga Veng)

STATS :

CHHINGA VENG SPIKERS

Morales Ponce De Leon : Point Hmuh - 22, Point Hloh - 8

Lalnunzira: Point Hmuh - 9, Point Hloh - 3

Vanlaltanpuia: Point Hmuh - 9, Point Hloh - 4

R Vanlalmawia: Point Hmuh - 8, Point Hloh - 3

H Malsawmsanga: Point Hmuh - 7, Point Hloh - 3

C Zonunmawia (setter): Point Hmuh - 4, Point Hloh - 2

TUICHANGRAL

Saidingpuia Sailo: Point Hmuh - 16, Point Hloh - 5

Rajneesh Singh: Point Hmuh - 12, Point Hloh - 4

Mahela Indeewar: Point Hmuh - 6, Point Hloh - 4

Lalrinpuia: Point Hmuh - 4, Point Hloh - 3

Amos Vanlalpeka: Point Hmuh - 3, Point Hloh - 1

H Lalramdinmawia (setter): Point Hmuh - 1, Point Hloh - 2

POINT TABLE

ANASTASIA: Play 5, Won 3, Loss 2 (set lak 13, set hloh 8) : Point 11

HUNTHAR: Play 4, Won 3, Loss 1 (set lak 11, set hloh 1) : Point 10

CHHINGA VENG: Play 5, Won 3, Loss 2 (set lak 12, set hloh 9) : Point 9

KHAWBEL: Play 5, Won 3, Loss 2 (set lak 10, set hloh 10) : Point 8

TUICHANGRAL: Play 5, Won 2, Loss 3 (set lak 9, set hloh 11) : Point 6

SIHPHIR: Play 5, Won 2, Loss 3 (set lak 8, set hloh 11) : Point 5

TNT: Play 5, Won 1, Loss 4 (set lak 5, set hloh 13) : Point 2

FIXTURE (Mipa) - Round 6

May 30, 2026 (Inrinni)

8:00 PM : Hunthar v Anastasia Electric Veng