Anurag Rawat-a’n Inrinni zana Pro Volleyball record thar siama inkhel tum khata point hlawh chhuak hnem ber a nih tumin Tuipuiral chakpui zo lo mah se Thawhlehni zana a record siam sa khum lehin tun tumah erawh hnehna a chanpui ta a, semifinal beiseina an nei thar bawk.

Delhi tlangval, Anurag-a hian set hnih hloh zawn tawh Tuipuiral hruai kirin 3-2-in Durtlang North an hneh a, a vawi khat nan Tata SK 712 Pro Volleyball League-ah an chak.

R Dengthuama Indoor Stadium, Mualpuiah 2-0, 10-5-a hniam zawk an nih hnuah chak duhna nei nasa zawk, Tuipuiralin 14-25, 20-25, 25-23, 25-23, 17-15-in Durtlang North an pawtthla a, a mawng atangin semifinal lut thei palinaah an insawn chho.

Inrinni zan khan kai thar, Tuipuiralin chiang taka set khatna an hloh hnuah tum hnih an la zawn a, chak zo lo chungin champion tura rin hlawh zinga mi, Hunthar an chhaih buai a, Anurag chuan point 54 a hlawh chhuak a, Pro Volleyball League record thar a siam.

Durtlang North hmaah set hmasa pahnih hloh zawn nghal mah se chak thei thinlung puin an bei let a. Anurag chuan tum 62 vaw tlain point 24 hloh mah se filawr taka D3 Business Player of the Match a nih rualin Tuipuiral point hmuh zawng zawng atanga 61% a thawk chhuak a. Inrinni zana a record siam a khum nghal bawk.

Durtlang North-in theihna nei mah se chak tur khawpa feiin an khel thei lo tluan a, Karnataka captain Anup D Costa chuan point 22 a hmuh chanve a paih a, team chakpui miah lovin Mizo leilungah tawn hriat chhe tak a hnutchhiah.

Vanlaltanpuia leh Johan Vanneihsanga’n point 14 ve ve thawk chhuakin mi mala an chet that tum a ni na a, champion lai ni chunga khelh nga tlawm zawn hmasa ni chungin Durtlang North-in championship an thlah liam a, point khat hmuin a mawngah an awm.

Vawi khat tal chak tumin inkhel an thunun hmasa a, awlsam taka set an lak hnuah 19-9-in hma an hruai a. Tuipuiral talbuaiin an innghahna Anurag an la chhuak a, lehlamin an player chhawr rim thenkhat an thlak bawk.

Set thum la zawna chak tlang mai thei turin Anup chuan vawi hnih a hlap tla zawn a, set thumna laihawl an thlen hma deuhin point ngain Tuipuiral an kalsan hman a; mahse, khelmuala a kir leh hnuah koham zawkin Anurag a inlar a, boruak tidanglamin 13-13 a nih hnuah 19-16-in an lehpel zui a. Durtlang North tanhmun a phet laklawh a, hnaih zui viau thin mah se an pawt ding zo tawh lo.

Set linaah KC Laldawngzela’n net chungah Durtlang North captain Fabian Lallunghnema vuak a dang tla a, Anurag chuan Anup-a vuak dal zui ve lehin 17-8-in Tuipuiral an sang a, an fal lai ber a ni.

Durtlang North-in player inkhairual zawk an nihna lantirin Johana’n a service atangin point a hmu a, 20-20 a nih hnuah 23-23 thlengin an intluk chho zel.

Hun pawimawhah Anurag chuan a hlap tla a, an inkhelh chhung zawnga a point hmuh leh hloh 14 ve ve, Fabian-a vuak a dansak zui bawk a, Tuipuiralin set an la zawn.

Rilru leh taksa lama fiahna tak tak hmachhawn dunin set ngana tirah 4-0-in Durtlang North an sang nghal a; mahse, a hma ang thovin a tawp thleng tura ke pen an harsat leh a, Anurag chuan Johan-a ball ben dang thlain Tuipuiralin 14-13-in an lehpel.

Point khat hmua chak thei dinhmuna an awm hmasak berah khawchhak team an hriam zo bik lo na a, 15-15 a nih hnuah Delhi tlangvalin point hlu tak a hlawh zawn a, a inkarah Fabian-a’n vuak tlak theihna hun tha a tihlawhtling zo lo a ni.

PC Vannunmawia’n point thum hloha tum nga a vuak tlak zinga a chanve aia tam set nganaah thawk chhuakin, vawi thum a vaw tla. Tuipuiral Mizo player-ten inrintawkna sang zawk nen an khel tih a lang a, Lalrammawia Fanai chuan point ruk hmuin vawi hnih a tisual.

Vawi li an khelh tawhah Tuipuiralin point thum an hmu a, chiang taka Chhinga Veng Spikers leh TNT laka an tlawm zawn hnuah rahbi an tuk sang zel a. Ningani zanah league an khel zo dawn a, anni aia point khata hniam, Tuichangral nen palina an inchuh dawn a ni.

Stats:
TUIPUIRAL:
Anurag Rawat: point hmuh - 62, point hloh - 24
Lalrammawia Fanai: point hmuh - 6, point hloh - 2
PC Vanlalnunmawia: point hmuh - 5, point hloh - 3
KC Laldawngzela: point hmuh - 3, point hloh - 1
Laltlanchhuaha: point hmuh - 0, point hloh - 2

DURTLANG NORTH:
Anup D Costa: point hmuh - 22, point hloh - 11
Vanlaltanpuia: point hmuh - 14, point hloh - 4
Johan Vanneihsanga: point hmuh - 14, point hloh - 5
R Vanlalmawia: point hmuh - 7, point hloh - 0
Fabian Lallunghnema: point hmuh - 14, point hloh - 14

POINT TABLE:
1. Thutak Nunpuitu Team: Play 4, Won 4, Loss 0 - Point 12
2. Chhinga Veng Spikers: Play 4, Won 3, Loss 1 - Point 9
3. Hunthar: Play 3, Won 3, Loss 0 - Point 8
4. Tuipuiral: Play 4, Won 1, Loss 3 - Point 3
5. Tuichangral: Play 4, Won 1, Loss 3 - Point 2
6. Durtlang North: Play 5, Won 0, Loss 5 - Point 2

FIXTURE:
JUNE 21 (NILAINI):
03:30 pm: Durtlang v Power Department Sporting Club (hmeichhia)
08:00 pm: TNT v Hunthar (mipa)

JUNE 22 (NINGANI):
03:30 pm: Luangmual v Kanan (hmeichhia)
08:00 pm: Tuichangral v Tuipuiral (mipa)