An khelh hnuhnung berah ama record siam tawh khuma Pro Volleyball League-a tum khat khelha point hmu hnem ber, Anurag Rawat che tha chhunzawmin khel tha berah thlan ni leh mah se semifinal lut tur inchuhnaa Tuipuiral a dinchanpui zo ta lo va, a thiam pali zingah Tuichangral an tel ta zawk.

Tuichangral hian semifinal hmun ruak hnuhnung luah khat hramin Ningani zan khan Tata SK 712 Pro Volleyball League-ah 3-2-in Tuipuiral hi an hneh a, a vawi thum nan semifinal an lut.

R Dengthuama Indoor Stadium, Mualpuiah team pahnhin palina an inchuh a. Vawi hnih set la hmasa zawk an nih hnuah Tuipuiral thahrui a zuai a, 23-25, 25-23, 18-25, 25-20, 15-5-in Tuichangralin an hneh let.

Durtlang North hneh zo hlim, Tuichangralin an elpui aia point khata sang zawk ni chungin khelmual an lut a. Set thumna thlengin phurna leh inrintawkna nen thiam takin Anurag an chhawr thei.

Inbeihna nasa leh boruak sang karah set nga chhung mar taka inlan tluan turin Anurag a tawngkhawng a, set hnuhnung pahnihah tla hniamin Tuipuiral an hnungtawlh a. Dinhmun tha leh beiseiawm atangin an zuih ral a, Pro Volleyball-a an tel hmasak berah uiawm takin an tla.

Chuti chungin Delhi tlangvalin point 59 hmuin 22 a hloh a, vawi nga an khelhah a tum li nan D3 Business Player of the Match-a thlan a ni a. A team tlangpui zo lo mah se mi malin a langsar fal a, a khelh hnuhnun vawi thuma point 174 ngawt thawk chhuakin hriat reng tlak sulhnu nen Mizoram a chhuahsan thei dawn.

Tum khat chiah chak chungin Tuipuiralin point li an hmu a, pangna niin league an khar a. Tuichangralin point li tho kawl mah se vawi hnih an chak avangin an sang zawk a, league khelh ngaa chak fai vek, TNT nen semifinal-ah an intawng dawn a ni.

Tuipuiral tan an thlen chin apiang thil thar zel a ni a, set hmasa berah 24-19-a sang zawk an nih hnuah point li an hloh zawn a, Anurag chuan boruak rit vai kiangin a chhan a, deuce ngai lovin an tlang.

Aizawl pawn atanga Pro Volleyball-a tel hmasa ber, Tuichangralin season khat an hmanna 2018-ah final an lut nghal a, a kum lehah knockout round thleng zo lovin tla mah se nikumah league-a sang ber dawttu ni chungin semifinal an khel.

Set hnihnaah tawn hriat nei leh Mizo player nei tha zawk an nihna  Saidingpuia Sailo chuan a lantir a. Vinod Khatkar nen inkawp rem tial tialin inelna san vanglai an tawng chho a, 23-23 a nih laiin Khawhai chhuanvawr, Saitea’n a vaw tla a, Anurag-a hlap a dang tla zui leh nghal.

Mahse, set an lak ve hnuah Tuichangral an nghet thei lo va, point thum leh lia hniam zawk ni chungin an um zui a, ho taka ball an tlaktir fo bakah hlap tlak an harsat tel bawk a. Insawrbingna thar nen Anurag chuan a hnung leh hma atangin nuam ti takin a vaw ve thung a, an inkar tizau zelin mipui au thawm atangin Tuichang aiin Tuipui a lian zawk.

Set an hloh leh chuan Tuichangral an tla dawn a, coach David Fanai chuan thutlukna huaisen tak siamin setter Hmangaihthanga a thlak a, a tawp thlengin ball vawtu zinga mi, Lalrinchhan a hmang tluan.

A hma aiin player hrang hrang theihna an hmang daihzai a, Vinod leh Saitea bakah Vanlalthlamuanpuia Sailo leh H Lalrinmawia’n ball an hmuh an chhawr thei bawk a. Team boruak siam tha chhovin Saitea’n 15-12-a hma an hruai nan a hlap a, a tlak rualin a ke tinâin Hunthar an hneh loh tum ang bawkin lak chhuah a ni.

Hetih lai hian an rin ber niin point riat hloh mah se vawi 20 a vaw tla hman a. Tuichangral tan thil pawi ni mah se paukhauh takin an bei zui a, net bula lehlam ball vuak dang tura an luhtir, Thangminlal chuan team tanpui telin inkhel boruak an thlak danglam.

Set lina laihawl atangin Anurag chuan ngai a awh tawh lo va, a chau tih hriat nan ball vuak sual leh point hloh an nei fo a, Tuipuiral an tla fual telh telh a. Inrinni khan Durtlang North hmaah set hmasa pahnih an hloh nghal a, Delhi spiker-in point 60 chuang hmuin hnehna kawngah hruai kir thei mah se set nga a tlin tawh lo.

Tuichangral an phur telh telh a, a chak tur tihfelna hnuhnungah rin ngamin Vinod a inlan thar leh a, a tawpah vawi 22 hlap tlain Saitea a khum a, point an hloh zat a inang a. Muanpuia leh Rinmawia’n an hmabak hlen bawkin fal takin lehlam an kalsan.

Tuipuiralin Anurag hman tangkai leh viau an tum laiin point a hloh zawn a, a kutthlak a dik tawk tawh loh avangin vuak tlak a harsat a. Hun pawimawhah duhthlan tur dang an awm chuang lo va, KC Laldawngzela’n vawi hnih a hlap tla tih loh PC Vannunmawia leh Vanlalremruatpuia’n court pawnah ve ve an vaw chhuak.

Point nga chiah an hmu ve hman tihin Tuichangralin 11-5 atangin hnehna ban an phar zui a, team inelna tak takah Tuipuiral an nem a. Mizo player zinga thawh hlawk ber, Nunmawia’n point nga hmuin tum thum a tisual a, Anurag nen an inthlau hle a ni.

Stats:
TUICHANGRAL:
Vinod Khatkar: point hmuh - 22, point hloh - 8
Saidingpuia Sailo: point hmuh - 20, point hloh - 8
H Lalrinmawia: point hmuh - 6, point hloh - 1
Vanlalthlamuanpuia Sailo: point hmuh - 6, point hloh - 3
Lalrinchhana: point hmuh - 6, point hloh - 3
Lalhmunmawia: point hmuh - 6, point hloh - 4

TUIPUIRAL:
Anurag Rawat: point hmuh - 59, point hloh - 20
PC Vanlalnunmawia: point hmuh - 5, point hloh - 3
Lalrammawia Fanai: point hmuh - 3, point hloh - 4
KC Laldawngzela: point hmuh - 3, point hloh - 3
Laltlanchhuaha: point hmuh - 3, point hloh - 2
Vanlalremruatpuia: point hmuh - 2, point hloh - 3

POINT TABLE:
1. Thutak Nunpuitu Team: Play 5, Won 5, Loss 0 - Point 15
2. Chhinga Veng Spikers: Play 4, Won 3, Loss 1 - Point 9
3. Hunthar: Play 4, Won 3, Loss 1 - Point 8
4. Tuichangral: Play 5, Won 2, Loss 3 - Point 4
5. Tuipuiral: Play 5, Won 1, Loss 4 - Point 4
6. Durtlang North: Play 5, Won 0, Loss 5 - Point 2

FIXTURE:
JUNE 23 (ZIRTAWPNI):
08:00 pm: Chhinga Veng Spikers v Hunthar (mipa)

SEMIFINAL:
JUNE 24 (INRINNI):
08:00 pm: Luangmual v Bungkawn (hmeichhia)

JUNE 26 (THAWHTANNI):
08:00 pm: Kanan v Bethlehem Vengthlang (hmeichhia)

JUNE 27 (THAWHLEHNI):
08:00 pm: TNT v Tuichangral (mipa)

JUNE 28 (NILAINI):
08:00 pm: Chhinga Veng Spikers v Hunthar (mipa)