LPS Arena, Falkland-ah Delhi tlangval Anurag chuan set khatnaah vawi 15 a vaw tla hman a, Fabian Lallunghnema leh Lalnunfela'n thlawp zuiin 25-21, 25-20, 25-20-in an chak.

Vawi khat aia tam champion thei awm chhun Huntharin nikumah a tum thum nan trophy la thei turin hun tha an nei a, final-ah set hnih set khata hma an hruai hnuah Thutak Nunpuitu Team-in an pawtthla.

Kar hmasa thawhlehni zan khan championship hawnnaah TNT nen intawng leh nghalin, kum kal taa rilru na taka an tlawmna chhang letin set thum faiin an chak a, Anurag chuan point 22 hmuin 13 a hloh a, Fabian-a leh Wilson Lalremruata'n point 10 ve ve an hlawh chhuak bawk.

Chhinga Veng hmaah hmasawn zawkin Tuipuiral spiker hlui Anurag a inlan a, tum 26 hlap tlain vawi sarih a tisual a, Kuriz Player of the Match ni zawn hmasa ber a ni. Fabian-a'n hlawk zawkin a khel bawk a, point thum chiah hlohin 14 a thawk chhuak a ni.

An khelh hmasak vawi hnihah Spikers-in tournament tan hmaa rin hlawh ve ve an hmachhawn nghal a. Set la lova Tuichangral laka an tlawm hnuah Hunthar hmaah Yougank Baliyan a mal tan viau a, tum 20 hlap thlain point kua a paih a, set a lakpui zo lo.

Lalneihpuia Hrahsel leh Lalnunpuia chuan point ruk hmuin tum li an tisual ve ve a, Chhinga Veng mizo player zinga thawh hlawk ve ve an ni.

Set khatnaah Anurag a filawr a, ball a hmuh vaw tla deuh vekin point 15 a hmu a, tum hnih a hloh. 13-8-a Hunthar an san hnuah Spikers-in an hnaih chilh zo lo tluan a, Lalchungnunga'n a hlap tlak rualin 23-21-in an inkar tizim mah se Fabian-a'n a chhang let a, Chhinga Vengin point hloh zuiin set an hloh.

Set hnihna tir lamah Spikers tan Yougank rin tlak viau mah se Huntharin a vuak an dansak rualin 13-9-in hma an hruai a, hawi kir lovin 23-20-a nih hnuah Anurag leh Fabian-a'n an hlap tla zawn a ni.

Set khat tal lak tumin Chhinga Vengin player an siksawi nasa a, set thumnaah 14-14 thlengin an inum tawk hle. Ball vuak tlak leh lehlam hlap lo lak leh dan kawngah Hunthar an chungnung a, derthawng lovin set hnihna ang bawkin 23-20 a nih hnuah Anurag leh Fabian-a'n an vaw tla zawn leh a ni.

Hunthar tan Nunfela'n point kua hmuin tum thum a tisual a, R Lallawmkima'n vawi nga vaw tlain point khat a paih bawk. An bitum lakah hmahruaitu zel an nih avangin boruak ritin a tibuai rih lo va, an player tute pawhin inringtawk takin an khel thei.

Khelh hnihah set hloh lovin Huntharin point ruk an hmu a, table-ah sang berin May 7 zanah kai thar Hlimen nen an intawng ang. A mawnga awm Chhinga Vengin May 9 zanah TNT an su dawn a, a awlsam dawn lo hle a ni.

STATS

HUNTHAR

Anurag Rawat : point hmuh 26, point hloh 7

Fabian Lallunghnema : point hmuh 14, point hloh 3

Lalnunfela : point hmuh 9, point hloh 3

R Lallawmkima : point hmuh 5, point hloh 1

Lalhruaizela : point hmuh 3, point hloh 1

C Lalhriatpuia : point hmuh 3, point hloh 5

Remsangzuala (setter) : point hmuh 1, point hloh 0

CHHINGA VENG SPIKERS

Yougank Baliyan : point hmuh 20, point hloh 9

Lalneihpuia Hrahsel : point hmuh 6, point hloh 4

Lalnunpuia : point hmuh 6, point hloh 4

Lalchungnunga : point hmuh 5, point hloh 5

Thangzika Pautu : point hmuh 3, point hloh 1

Lalnuntluanga : point hmuh 2, point hloh 0

Lalfakawma : point hmuh 2, point hloh 1

Lalramhluna : point hmuh 3, point hloh 3

David Lalramhmachhuana (setter) : point hmuh 1, point hloh 3

POINT TABLE

HUNTHAR : Play 2, Won 2, Loss 0, Point 6

TUICHANGRAL : Play 2, Won 1, Loss 1, Point 4

DURTLANG NORTH : Play 1, Won 1, Loss 0, Point 3

THUTAK NUNPUITU TEAM : Play 2, Won 1, Loss 1, Point 2

HLIMEN : Play 1, Won 0, Loss 1, Point 0

CHHINGA VENG SPIKERS : Play 2, Won 0, Loss 2, Point 0

FIXTURE

May 3, zirtawpni 8:00pm :

DIAKKAWN V BUNGKAWN (hmeichhia)

May 4, inrinni 8:00pm :

THUTAK NUNPUITU TEAM V DURTLANG NORTH (mipa)

May 6, thawhtanni 8:00pm :

LUANGMUAL V DURTLANG (hmeichhia)

May 7, thawhlehni 8:00pm :

HLIMEN V HUNTHAR (mipa)