ZALEN, May 07, 2015: Chak mamawh Huntharin Mizo hlangin hnehna an thawk chhuak a, Thawhlehni zan EverHome Pro Volleyball League-ah set thum set khata Sihphir an hneh rualin beiseina thar an insiam.

LPS Arena, Falkland-ah khelh thum tlawm zawn thei turin Huntharin set khatna an hloh bakah, hliam vangin an rin ber, Anurag Rawat an chhawr zui thei lo bawk a; mahse, Mizo hlanga an khelh hnuah player-ten nungchang ropui lantirin 19-25, 25-22, 26-24, 25-14-in Sihphir an hneh.

Set khatnaah 16-15-a sang zawk an nih laiin Anurag chuan a vaw kai lo a, tla sualin a ke vei lam a rap sual a, a khel zui thei lo. Amah thlaktu Rohluzuala’n set hnihna atangin team a fuih phur a, tum 15 hlap tlain point hnih chiah a hloh a, Kuriz Player of the Match-a thlan a ni.

League an khelh hmasak vawi hnihah Hunthar Mizo player-ten awmze nei tham hnuhma an nei lo zawn a. Sihphir lakah inrintawkna thar nen team an chawi kang a, Rohlua bakah Lalramhluna’n point 13 hmuin vawi thum a tisual a, Laldampuia’n tum 12 vaw tlain point li a paih bakah net bula lehlam vuak dangtu, Lalbiakmawia Khiangte chuan point 11 hmuin point ruk a hloh.

Set an lak hmasak hnuah Sihphirin rin hlawh mah se chak tura inngaihna an neih vang nge an insawrbing tawk lo a, tihsual an ngahin an khel a fel fai tawk lo va. Set thumnaah kir leh thei turin 24-23-a sang zawk an nih hnuah point tina theihtawp chhuahtu, Huntharin point thum an hmu zawn.

Niyas Adbul Salam chuan point 34 hmuin 14 a hloh a, Khawbel an hneh loh tum aiin a khel tha zawk hle naa, boruak sang leh rilru lama inelna nasaah Sihphir an khawng tawk lo va. An hneh theih tur, Hunthar lakah hun tha bawhpelha khelh hnih an tlawm zawn avangin an kawng a khirh zui dawn a ni.

Vawi thum an khelh tawhah Sihphir tan Lalhmunmawia (Mapuia)’n tlak hniam leh che that fal nei chuang lovin pangngai takin a khel chhunzawm a, Hunthar hmaah tum 11 vaw tlain vawi thum a tisual a, Albert Zothankhuma’n point riat a hmuh chanve hlohin Thangminlal Guite leh PC Lalnuntluanga’n point li an hmuh zatva an hloh bawk.

Anastasia Electric Veng laka chak tawh, Sihphirin Zirtawpniah Thutak Nunpuitu Team an khelhpui dawn a, semi-final lut turin chak an mamawh hle a. Huntharin tun karah an khel tawh dawn lo va, kar leh Thawhtanni zanah Tuichangral nen an inhmachhawn ang.

A tir atangin Hunthar leh Sihphir an inhnehtawk a, Anurag a inhliam hnuah 16-16 niin 19-19 thlengin intluk chho mah se ngampa takin Siphirin an nawr a; Nuntluanga’n point a hmuh zawn laiin Hunthar captain Dampuia vuak tum hnih an dang tla zawn bawk a. Niyas chuan tha taka a service hmanga point a hmuh hnuah Mapuia’n hlap tlain point ruk an hmu zawn a, an tlang.

A khelh chhungin Anurag chuan point khat hlohin tum riat a vaw tla a, a tel loh hnu set khatna tawp lama an chet dan avangin Huntharin rin an hlawh zui lo va. Khawbel leh TNT an hneh loh dan ang bawkin set la lova tlawm leh mai tura ngaih an nih hnuah Mizo player-ten theihna an neih lantirin inpumkhatna tha tak nen an nawr let.

Set hnihna tir atangin Hunthar an danglam nghal a, net bulah lehlam hlap dang turin an zuang taima a. Vuak sual an neih tam loh bakah inring tawnin player-ten mawhphurhna an la a, infuih tawn chungin an khel a, Rohlua’n a vuak tlak hnuah Niyas-a hlap tum hnih an dang tla a, 5-2-in an sang.

Siphir rinrawl, Niyas chuan set hmasa angin vuak tlak mai a harsat a, an tisual fo bawk a, team boruak a pawt hniam a. Point tinah Hunthar player-ten an ti mai mai lo va, Ramhluna’n a hlap tlak hnuah Nuntluanga vuak an dang a, 20-14-in hma an hruai fal.

Sihphirin bei let leh viau mah se hun pawimawhah Hunthar tan Rohlua a hlu a, 23-21-a sang zawk an nih laiin a vuak tlak bakah set an lak theih nan 24-22-ah a hlap tla zui bawk. Anurag-a tel lovin el tham an ni tih an lantir tel nghal a, set thumnaah Sihphir insangmar ve lehin an inum tawk hle.

23-21-in Hunthar an sang a, Niyas chuan point thumin a chhang let a, chiang taka a nam tlak hnuah Dampuia vuak a dang a, a vaw tla zui nghal bawk. Point khat hmuh belh se Sihphirin set hnih an lakna tur a ni a, lehlam tan intuai thar leh a harsa tawh hle ang.

Dampuia’n Hunthar thinphu tirehin a hlap tla a, 24-24 ni zuiin setter Ramngaihsanga’n net chung atangin Niyas-a vuak a dang tla a, Sihphir an derthawng ve thung. Kir leh tura hun tha an neih puitlin thei lovin Dampuia’n a service hmangin Huntharin set an lak zawnna point a thawk chhuak.

Rilru lamah Sihphirin harsatna tawk zuiin Hunthar erawh inrintawkna sang zawk nen an phur tulh tulh a, set thum la zawn thei turin 9-4 atangin an kalsan zel a, 21-11-in hma an hruai zui a. Sihphirin Niyas-a vuakna hmun thlak mah se thil awm dan a danglam lo va, Rohlua leh Ramhluna’n Hunthar fuih phurin nuam ti takin an khel a, hneh takin set lina an thunun tluan.

EVERHOME PRO VOLLEYBALL LEAGUE 2025

@ LPS Arena, Falkland

LEAGUE ROUND 3 : RESULT

May 6 (Thawhlehni) Zan

Hunthar def Sihphir (mipa)

= 19-25, 25-22, 26-24, 25-14 (3-1)

Kuriz Player of the Match

= Rohluzuala (Hunthar)

STATS

HUNTHAR

Rohluzuala : point hmuh 15, point hloh 2

Lalramhluna : point hmuh 13, point hloh 3

Laldampuia : point hmuh 12, point hloh 4

Lalbiakmawia Khiangte : point hmuh 11, point hloh 6 

Anurag Rawat : point hmuh 8, point hloh 1

R Lallawmkima : point hmuh 3, point hloh 3

Ramngaihsanga (setter) : point hmuh 1, point hloh 1 

SIHPHIR

Niyas Abdul Salam : point hmuh 35, point hloh 14

Lalhmunmawia : point hmuh 11, point hloh 3

Albert Zothankhuma  : point hmuh 8, point hloh 4

Thangminlal Guite : point hmuh 4, point hloh 2

PC Lalnuntluanga : point hmuh 4, point hloh 2

H Lalrinmawia : point hmuh 3, point hloh 2 

H Lalruatsanga (setter) : point hmuh 3, point hloh 1

POINT TABLE

KHAWBEL : Play 2, Won 2, Loss 0, Point 6

THUTAK NUNPUITU TEAM :  Play 2, Won 1, Loss 1, Point 3

ANASTASIA ELECTRIC VENG :  Play 2, Won 1, Loss 1, Point 3

TUICHANGRAL : Play 2, Won 1, Loss 1, Point 3

SIHPHIR  : Play 3, Won 1, Loss 2, Point 3

HUNTHAR :  Play 3, Won 1, Loss 2, Point 3

FIXTURE

MAY 7, 2025 (NILAINI) - 8:00 PM

Tuichangral v Khawbel

MAY 8, 2025 (NINGANI) - 8:00 PM

Thutak Nunpuitu Team v Anastasia Electric Veng

MAY 9, 2025 (ZIRTAWPNI) - 8:00 PM

Sihphir v Thutak Nunpuitu Team

MAY 10, 2025 (INRINNI) - 8:00 PM

Anastasia Electric Veng v Khawbel