ZALEN, May 31, 2026: Huntharin chungnung takin inkhel an thunun tluan a, Anastasia Electric Veng el phak lohva set thum an lak zawn rualin hmahruaitu ni chungin Mizoram Rural Bank Pro Volleyball League semifinal an lut.

Team pahnihte hi Inrinni zan khan knockout round lut sa tawh chungin an inhmachhawn a, table-a sang ber nih inchuhna inkhelah Huntharin engkim an awpbet a. Champion lai, Anastasia talbuai tluanin a mawng lama awm ang maiin an che nawi a, rin an hlawh tawhna hlohin an tla hniam.

Suryansh Tomar chuan vawi 19 vaw tlain point kua a hloh a, Hunthar chakna hnar pawimawh ni zui zelin a vawi hnih nan Kuriz Player of the Match-a thlan a ni a. Tum dang zawng aiin a lai atanga lehlam vuak dangtu ve ve, Wilson Lalremruata leh Lalbiakmawia Khiangte an che tha a, rang taka an vuak tlak theih nan setter Remsangzuala nen inman leh zualin an khel thei a, Wilson-a’n point kua hmuin vawi li a tisual a, Biakmawia’n hloh nei miah lovin point sarih a hmu.

Khelh hnih a talbuai zawn hnuah Lalbiakmuana’n point ruk hmuin point hnih chiah a paih a, ngai a awh chhoh leh laiin rinrawl, Fabian Lallunghnema a hnungtawlh ve thung a; mahse, team pawt hniam khawp erawh a ni lo.

Vawi nga an khelh tawhah a tum li nan Hunthar chakin point 13 an hmu a, a chung ber luah nghet nghalin lehpelh theih an ni tawh lo va, Inrinni zanah Chhinga Veng Spikers nen inkhelin league an khar ang.

Thutak Nunpuitu Team laka an chet sual hnuah hriam leh khauh zawkin vawi thum champion tawh Hunthar an kir leh a, an khelh hnuhnun tum hnihah chiang takin Tuichangral leh Anastasia an hneh zawn a. Inpumkhat zawkin ball vuak tlak mai ni lovin lehlam hlap dang kawngah hma an sawn a, vuak an lak theih bakah Anastasia lakah tha takin an service a, chet an awlsam phah.

An khelh hnuhnun vawi hnihah Anastasia tlawm zawn ve thungin inelna sanga danglamna siam thei an tlachham tih a lang a. A hma aiin Karthik Madhu thlaktu, Kush Singh-a’n ball a hmu hnem a, vawi thum a khelhna niin point 14 hmuin 11 a hloh a, an team tan hnuhma nei ber ni mah se awmzia a nei pha lo.

Hunthar hmaah team pum puiin vuak tlak an harsat avangin an bet tluan a, an innghahna Zomuansanga leh Laldinsanga ten point an hmuh zat an paih ral ve ve a, Electric Veng team a zawm hnuah Zosangzuala chet nep ber tum a ni bawk.

Anastasia-in vawi ruk an khelh kimna a ni a, zuamawm takin league an khar a. A tum thum nan tlawmin point 11 an hmu a, a chung ber atangin pahnihnaah an chhuk a. Hniam lam pan zui thei turin an elpui team dangin vawi khat theuh an la khel dawn a, semifinal hmain kar khat chuang insiam thar leh nan hun an nei ve thung.

Hunthar hmaah beisei pha lo takin a tir atangin an inlan a, Uttar Pradesh atanga an lak luh, Kush-a’n a zawna a tihsual kar lakah Helly Vanlalliana vuak an dansak bawk a. A hnuah service an lak chhiat avangin Suryansh-a’n vaw zuiin 22-14-in Hunthar an kal fal a, inthlau zui takin an tlang.

Set hnihnaah an vuak tlak ve theih loh avangin Anastasia an chiai a, service an lak chhiat bakah ball inchuh vanga point hloh an neih laiin lehlam tan Wilson, Suryansh leh Biakmuana ten an hlap tla a, 18-12-in Hunthar an fal.

Set hmasa aiin Anastasia-in nawr let na thei zawk mah se an tiderthawng pha chuang lo va, Kush-a’n Suryansh-a vuak a dansak hnuah a vaw tla a, 22-24-in an hnaih hman tihin point hloh hun lovah Zomuana’n a service sual a ni.

Anastasia-in inrintawkna an nei zo tawh lo a, set thumna tir lamah Huntharin Kush, Zomuana leh Dinsanga thlaktu, Ngursangzuala vuak an dang tla zawn. Helly-a’n a vuak sual ve leh hnuah Biakmawia’n chiang takin Kush-a hlap a dansak bawk a, rin tur chuang an awm lo va. Huntharin khelhna hmun chang lo player thenkhat an luhtir a, point 10 chuanga inthlau chungin inkhel an titawp.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT 

Round 6 - May 30, 2026 (Inrinni)

Hunthar def Anastasia Electric Veng (mipa)

25-19, 25-22, 25-14 (3-0)

Kuriz Player of the Match - Suryansh Tomar (Hunthar)

Cheetak Fan of the Night - Lalruatfela (Hunthar)

MVA Lucky Fan - Lalbiakdiki (Hunthar), Lalremruati (Electric Veng)

STATS:

HUNTHAR

Suryansh Tomar: Point Hmuh - 19, Point Hloh - 9

Wilson Lalremruata: Point Hmuh - 9, Point Hloh - 4

Lalbiakmawia Khiangte: Point Hmuh - 7, Point Hloh - 0

Fabian Lallunghnema: Point Hmuh - 7, Point Hloh - 6

Lalbiakmuana: Point Hmuh - 6, Point Hloh - 2

Remsangzuala (setter): Point Hmuh - 2, Point Hloh - 1

ANASTASIA ELECTRIC VENG

Kush Singh: Point Hmuh - 14, Point Hloh - 11

Zomuansanga: Point Hmuh - 7, Point Hloh - 7

Laldinsanga: Point Hmuh - 5, Point Hloh - 5

Zosangzuala: Point Hmuh - 4, Point Hloh - 2

Ngursangzuala: Point Hmuh - 4, Point Hloh - 2

Helly Vanlalliana: Point Hmuh - 1, Point Hloh - 2

Ramdintluanga (setter): Point Hmuh - 0, Point Hloh - 1

POINT TABLE

HUNTHAR: Play 5, Won 4, Loss 1 (set lak 13, set hloh 5) : Point 13

ANASTASIA: Play 6, Won 3, Loss 3 (set lak 13, set hloh 11) : Point 11

CHHINGA VENG: Play 5, Won 3, Loss 2 (set lak 12, set hloh 9) : Point 9

KHAWBEL: Play 5, Won 3, Loss 2 (set lak 10, set hloh 10) : Point 8

TUICHANGRAL: Play 5, Won 2, Loss 3 (set lak 9, set hloh 11) : Point 6

SIHPHIR: Play 5, Won 2, Loss 3 (set lak 8, set hloh 11) : Point 5

TNT: Play 5, Won 1, Loss 4 (set lak 5, set hloh 13) : Point 2

FIXTURE

HMEICHHIA - ROUND 1

June 01, (Thawhtanni)

4:00 PM : Eric Pautu Academy v ITI Veng GSA

8:00 PM : Chhinga Veng Spikers v Tuichangral

MIPA - Round 7

June, 02, 2026 (Thawhlehni)

8:00 PM : Thutak Nunpuitu Team v Khawbel

HMEICHHIA - ROUND 2

June 03, 2026 (Nilaini)

8:00 PM : Eric Pautu Academy v Chhinga Veng Spikers

MIPA - Round 7

June 04, 2026 (Ningani)

8:00 PM : Tuichangral v Sihphir

HMEICHHIA - ROUND 2

June 05, 2026 (Zirtawpni)

8:00 PM : ITI Veng GSA v Tuichangral

MIPA - Round 7

June 06, 2026 (Inrinni)

8:00 PM : Chhinga Veng Spikers v Hunthar