Bethlehem Vengthlangin title humhim thei turin semifinal an lut a, Thawhtanni tlai Tata SK 712 Pro Volleyball League-ah 3-0-a an chak rualin Power Department Sporting Club an tla.

Set khatnaah hranghlui awm khawmna team aiin Bethlehem Vengthlang an hriam a, a hnuah inkhel awpbet tluanin 25-23, 25-16, 25-19-in an chak.

Nikuma an champion tawhna, R Dengthuama Indoor Stadium, Mualpuiah hnehna awmze nei an chang thar leh a. Elisian Medai chuan point 24 hmuin vawi li hloh mah se a vawi thum nan D3 Business Player of the Match a ni a, league tum nga khel zovin a vawi thum nan Bethlehem Vengthlang a chakpui.

2017 Pro Volleyball hmeichhe champion hmasa ber a nih hnuah Power an tawp a, team tuai thar leh mah se mi thar aiin an player ni thin an koh kirte tho an la hmachhuan.

Set hmasa berah 23-23 a nih laiin kum nga kal taa player tha ber leh fa pahnih nei tawh, Vardingliani’n a nam kai lo va, Bethlehem Vengthlang tan Lalramengi Ralte chuan hmun awlah dah zuiin hun pawimawhah point hmu zawnin an tlang.

Set hnihna atangin Serkawn, Lunglei nula, Elisian leh a thianten thatho leh zuan zang zawkin inkhel an thunun a, thiltihtheihna nei tur khawpin Power-in an bei let pha tawh lo va, an bet tluan.

Flora Lalrinmawii’n vawi riat vaw tlain tum li a tisual a, Lalchhandami’n Bethlehem Vengthlang tan point hnih hlohin tum ruk a thawk chhuak bawk a. Power-in chak ngei ngei an mamawh mah se team pum pui khaikhinin an khing zo lo.

Team tha hlun ni thin, Power tan team chawi kang tur khawpa danglamna siam thei an awm lo va, Dingi’n tum 10 hlap tlain point ruk a paih laiin FP Lalduhkimi’n point kua a hmuh hmun thuma thena hmun khat a tisual.

Vawi li an khelhah Power-in point khat chiah hmuin an tlawm vek a, khelh khat la nei chungin palina an umpha thei tawh lo va, a mawnga awm, Durtlang nen an tla.

Hetih lai hian khelh khat la nei, Bungkawnin point nga kawl mekin palina ni chungin an tlang ve thung a, an chunga awm, Bethlehem Vengthlang aiin point liin an hniam a ni.

Stats:
BETHLEHEM VENGTHLANG:
Elisian Medai: point hmuh - 24, point hloh - 4
Flora Lalrinmawii: point hmuh - 8, point hloh - 4
Lalchhandami: point hmuh - 6, point hloh - 2
Elina B Lalenkawli: point hmuh - 3, point hloh - 2
Lalramengi Ralte: point hmuh - 3, point hloh - 3
Chinglunkimi: point hmuh - 4, point hloh - 10

POWER:
FP Lalduhkimi: point hmuh - 9, point hloh - 3
Vardingliani: point hmuh - 10, point hloh - 6
Vanlalremruati: point hmuh - 6, point hloh - 3
Lalfakzuali: point hmuh - 4, point hloh - 2
Lalrammawii: point hmuh - 5, point hloh - 6

POINT TABLE:
1. Luangmual: Play 4, Won 4, Loss 0 - Point 12
2. Kanan: Play 3, Won 3, Loss 0 - Point 9
3. Bethlehem Vengthlang: Play 5, Won 3, Loss 2 - Point 9
4. Bungkawn: Play 4, Won 2, Loss 2 - Point 5
5. Power Department SC: Play 4, Won 0, Loss 4 - Point 1
6. Durtlang: Play 4, Won 0, Loss 4 - Point 0

JUNE 19 (THAWHTANNI):
08:00 pm: Tuichangral v Chhinga Veng Spikers (mipa)

JUNE 20 (THAWHLEHNI):
03:30 pm: Kanan v Bungkawn (hmeichhia)
08:00 pm: Tuipuiral v Durtlang North (mipa)