ZALEN, Apr. 30, 2025: Pro Volleyball League-a team hlawhtling ber leh vawi khat aia tam champion thei awm chhun, nomawi kal mektu ni bawk, Huntharin an title humhim thei turin hun tha an nei a. Nikuma champion-puitu Anurag Rawat bawk chah chhuak lehin a tawp thlen leh ngei an tum.

Nikum May thla khan Mizorama volleyball inpui tia chhal ngam veng hi a vawi thum nan an champion a, hlim taka trophy an lawm hnuah harsatna tawkin Pro Division-ah an awm zui thei lo.

Kuminah hian playoff hmangin Mizoram inelna sang berah an kir leh thei a, nomawi humhim tura an inbuatsaihna kawngah nikuma an champion theihna kawnga thawh hlawk tak, Delhi spiker Anurag an la lut leh.

Coach VL Malsawma Renthlei chuan division hniama awm an nih avangin Pro Division inelnaa tel turin an player-te an tha tawk lo tih a sawi a, chutih rualin Pro Volleyball atan state pawn player bakah Mizo player pathum aia tam an lak belh theih avangin team thar leh title cho ngam din tumin tan an la a ni.

Nikuma champion team zinga langsar, spiker Fabian Lallunghnema leh setter Remsangzuala an hmang thei tawh dawn lo va, veteran setter Ramtharnghaka la lutin Laldampuia, Lalramhluna, Ramgaihsanga te hovin Anurag an thawhpui a ngai dawn.

Pro Volleyball mipa inelnaa la tel kim vek team pahnih zinga mi, Hunthar hi Pro Division-a awm sa an nih loh avangin Mizo player langsar an seng khawm thei lo va, an boruak pawhin kum dang a phak lo va; mahse, volleyball nena inzawmna thuk tak an neih tawh avangin an lakah beiseina a sang tho.

Champion lai hian Nilaini zan dar 08:00 hian Falkland, Aizawla LPS Arena-ah Pro Volleyball League-a vawi khat inlanna tur, Khawbel an hmachhawn dawn a ni.

HUNTHAR SQUAD:

1. Laldampuia

2. Isreal B Ramdinsanga

3. Lalbiakmawia Khiangte

4. Lalliansanga Kawlni

5. T Vanlalpekhlua

6. PC Zoramthara

7. Ramngaihsanga

8. Joseph Zairemtluanga

9. Lalchhuanmawia

10. Rohluzuala

11. Timothy Vanlalrinawma

12. Malsawm Lalruatpuia

13. Lalhriatzela

14. Lalramhluna

15. C Lalngaihawma

16. Lalthanzuala

17. Ramtharnghaka

18. R Malsawmkima

19. Lalrinfela

20. Anurag Rawat

Coach: VL Malsawma Renthlei

HUNTHAR FIXTURE (League round):

APRIL 30, 2025 (NILAINI) - 8:00 PM

Khawbel v Hunthar

MAY 3, 2025 (INRINNI) - 8:00 PM

Hunthar v Thutak Nunpuitu Team

MAY 6, 2025 (THAWHLEHNI) - 8:00 PM

Hunthar v Sihphir

MAY 12, 2025 (THAWHTANNI) - 8:00 PM

Hunthar v Tuichangral

MAY 14, 2025 (NILAINI) - 8:00 PM

Anastasia Electric Veng v Hunthar