Pro Volleyball League-a an inlan hmasak berah chungchuang takin Luangmual an champion a, player thawhhona a tha a, fak tur bik awm lo mah se hmuhnawm bik erawh an awm.

Player hmuhnawm pahnih
Tata SK 712 Pro Volleyball League hmeichhe khelh zawh takah Ningani zan khan Luangmualin 3-0 a Kanan hnehin chungchuang takin an champion a, vawi sarih an khelhah khing zo an awm lo.

An player thawhhona leh tanrualna a that rualin mi malin setter F Lallianchhungi leh spiker Nipa Barad-i te an hmuhnawm a. Chhungi hian Best Spiker atana thlan, Nipa-i chu khelhpui nuam a ti a, tawng lamah inman lutuk lo mah se khelmualah erawh an inman hle.

A ball vawrh vaw tla thintu, Nipa-i chungchangah Chhungi chuan, “Khelhpui a harsa lo, nuam ti takin kan khel ho thei,” tiin a sawi a. “A lung a leng ve deuh va, chuti tih lohvah chuan Mizoram pawh nuam a ti,” a ti bawk.

Nipa-i hi Mizo mipa tam takin an chen loh tur, feet 5 leh inchi 9 zeta sang ni mah se ball duh sang chi a ni lo va, Mizo player dangte duh ang vel tho a duh avangin atan ball vawrh san zawngah inzir tharna tur a awm lo va, an inkarah buaina a awm lo niin Chhungi chuan a sawi.

“Ball sang a duh lo va, high ball kan tih ang chi-ah pawh a hniam lam zawk hret zel a duh avangin Mizo player dang ball ka lo vawrhsak tawhte nen an danglam tam lo va, ka tan harsat phahna a awm lo,” a ti.

Best Spiker Nipa-i hian khelh sarihah point 196 thawk chhuakin 62 a paih thung a. An champion tukah haw nghalin India camp a zawm zui dawn nghe nghe a ni.

Mahni veng hmaah best setter
Best setter-a thlan tak, kum 22 mi, Chhungi hi season hmasa lamah chuan an chenna veng, Kanan tan a khel thin a, tun season-ah Luangmualin la chhuakin an tifuh ta hle.

Final-a a chenna veng hmachhawn chu a zamawm duh tih a sawi a, “Mahse, min fuihtu an tha a, player hrang hlui zawk te, pawn lam atangin min fuiha thu tha min hrilhtu an tam a, an chungah ka lawm tak zet a ni,” a ti. 

“Player dang leh kan hruaituten min fuih reng a, ka nu leh pa pawhin min thlawp tha a, ka lawm hle,” tiin Govt. Hrangbana College-a zirlai nula chuan a sawi.

Coach tha ber Lalrova’n a player-te a fak
Mizorama volleyball inelna sang berah Luangmual champion-puitu, Electric Veng, Aizawla cheng, Lalrova chu Best Coach atan thlan a ni a, a lawmman dawn theih chhan hi a thawhpuite vang a nih thu a sawi.

Coach Lalrova chuan chuan a player leh an hruaitute chungah lawm thu a sawi a, an thawhhona that vang liau liau niin a sawi.

“Player-te, inpekna leh discipline a tha a, thu an awih a, an inlungrual a, kan tawngtai hnem bawk a, chung zawng zawng rah chu a ni,” a ti a. Club hruaitu leh coaching staff-te inpeknaah lawmthu a sawi bawk.

A naute chungchang sawiin, “Coach chuan khelh dan tur ruahman (game plan) kan nei a, player neih that loh leh thu awih loh chuan kan tum angin a tih ngawt theih loh va; chuvangin, kan player-ten thu an awihin ruahman anga ti turin an awm thei zel a ni,” tiin a fak.

Luangmual champion-puitu Lalrova hi Mizo volleyball coach-ah chuan tawnhriat nei tha ber zinga mi a ni a. Pro Volleyball-ah pawh hian a hmasa ber, kum 2016 khan mipaah an veng club, Anastacia chu final-a an hneh tak, Kanan kaihruaitu, Eric Pautu nen an lo champion-pui tawh.

Inter Branch YMA Volleyball-ah pawh an branch hmeichhe team chu kum 2003 leh 2004 khan a zawnin a champion-pui a. Mizoram Volleyball Association Inter District Championship-ah pawh Aizawl district chu mipa leh hmeichhiaah a champion-pui tawh bawk.