A umtu zawk ni chungin Tuichangralin Durtlang North tan hnuhma chhia an hnutchhiah belh a, Ningani zan Tata SK 712 Pro Volleyball League-ah 3-2-in an hneh a. Champion lai hian champion ni chunga hneh nei lova kaltluang record ding lai an nihrual ta chiah.

R Dengthuama Indoor Stadium, Mualpuiah Tuichangralin paukhauh takin an khel a, an mamawh hnehna changin 20-25, 25-23, 18-25, 26-24, 15-12-in an chak.

Lalhmunmawia (Mapuia) chuan point 22 hmuin tum nga a hloh a, Vinod Khatkar chuan vawi 25 vaw tlain point 11 a paih ve thung a. League kal meka vawi thum an khelhah a tum khat nan Tuichangral an chak a, semifinal beiseina thar an insiam.

D3 Business Player of the Match-a thlan, Anup D Costa chuan point 40 thawk chhuakin 11 a hloh a, chak beiseiawm takin set khatna leh thumna lakpui mah se mang chhiain Durtlang North a um zui zel.

Vawi li an khelh tawhah tlawm vekin tlak an hnaih a, kum kal taa Chhinga Veng Spikers-in sulhnu chhia an hnutchhiah, champion lai ni chhunga chak nei lo zawn rei ber an nih rual chiah a ni.

Inkhel pawimawh leh inhnehtawk taka inbeihnaah Tuichangralin set hnih an hloh avangin point hnih bak an hlawh chhuak zo bik lo va. Durtlang North nen point an insem avangin hmahruaitu, TNT-in khelh hnih la nei chungin semifinal an luh phah a, team pahnih hian point kua an kawl mek an umpha thei tawh lo a ni.

Hunthar leh TNT hneh lova an tlawm zawn hnuah Tuichangralin rilru lama fiahna an hmachhawn a. An khelh hmasak bera hliam vanga lak chhuah, Saidingpuia Sailo chuan tum 14 hlap tlain point 10 a hloh a, taksa lamah a inpeih tawk lo va, tum dang a pha lo.

Mahse, state pawn atanga an lak luh Vinod thlawp zovin Mapuia a che tha a, Tuichangral tan mi mala thawh hlawk ber ni khawpin a tangkai a. Vanlalthlamuanpuia Sailo chuan point kua hmuin vawi hnih chiah a tisual a, setter Hmangaihthanga’n awmze neiin ball a sem a, team pum puiin hma an sawn.

Durtlang North-in derthawng lova set khatna an lak hnuah 9-5-in hma an hruai zui a. Mapuia’n tha tak taka a vuak thlak hmangin Tuichangral a fuih phur a, lehlam tana point hmutu ber, Anup-a vuak an dang fo bawk a, 22-21-a an lehpelh hnuah Khawhai tlangval, Saitea’n set an lak theih nan vawi thum a vaw tla.

Tuichangralin mar takin hma lam an pan thei bik chuang lo va. Durtlang North insiam tharin Anup bakah an inkhelh chhunga point ruk hloha 23 thawk chhuak thei, Fabian Lallunghnema’n langsar takin a khel a, set khatna aia nasain set thumna an awpbet.

Durtlang North-in championship kal mek inkhel vawi khata set hnih an lak hmasak ber a ni a, chak tlang thei mai turin rin hlawh hman a; mahse, Tuichangralin inthununna tha tak nen set lina bul an tan a, inelna sang hmachhawnin 19-19 a nih hnuah 24-24 thlengin an intluk chho zel.

Hun pawimawhah Vinod chuan Tuichangral tan point nga a hmu zawn a, 25-24-a sang zawk an nih laiin Mapuia’n net bulah Durtlang North captain Fabian-a hlap a dang thla a, a chak zawk tifel turin set nga an khelh a ngai zui.

Tuichangralin inrintawkna nen bul an tan tha a, inthlau lo mah se hmahruaitu zawka an tang zel a. Boruak sangah Durtlang North-in rim takin Karnataka captain Anup an chhawr a, 10-10 a nih hnuah player duhthlan tur ngah zawk leh inring tawn chunga khel Tuichangralin 14-11-in hma an hruai.

Anup chuan vawi khat vaw tla leh hman mah se Haryana spiker Vinod chuan a chhang let ve leh nghal a. Mipa league kal meka set nga an khelhna hmasa berah Tuichangral dingchangin, Thawhtanni zanah boruak thar hip chungin Chhinga Veng an khelhpui leh ang.

Durtlang North-in kar leh thawhlehni zanah Tuipuiral hmachhawnin league an khar dawn a, chak pawh ni se semifinal luh theihna kawng a ping tawh hle.

Stats:
TUICHANGRAL:
Vinod Khatkar: point hmuh - 25, point hloh - 11
Saidingpuia Sailo: point hmuh - 14, point hloh - 10
Lalhmunmawia: point hmuh - 22, point hloh - 5
Vanlalthlamuanpuia Sailo: point hmuh - 9, point hloh - 2
Lalrinchhana: point hmuh - 3, point hloh - 3
Hmangaihthanga (setter): point hmuh - 1, point hloh - 2
Thangminlal: point hmuh - 0, point hloh - 2

DURTLANG NORTH:
Anup D Costa: point hmuh - 40, point hloh - 11
Johan Vanneihsanga: point hmuh - 7, point hloh - 2
Fabian Lallunghnema: point hmuh - 23, point hloh - 6
Vanlaltanpuia: point hmuh - 12, point hloh - 3
R Malsawmtluanga: point hmuh - 2, point hloh - 4
C Zonunmawia (setter): point hmuh - 5, point hloh - 6
R Vanlalmawia: point hmuh - 5, point hloh - 0

POINT TABLE:
1. Thutak Nunpuitu Team: Play 3, Won 3, Loss 0 - Point 9
2. Hunthar: Play 2, Won 2, Loss 0 - Point 6
3. Chhinga Veng Spikers: Play 2, Won 2, Loss 0 - Point 6
4. Tuichangral: Play 3, Won 1, Loss 2 - Point 2
5. Durtlang North: Play 4, Won 0, Loss 4 - Point 1
6. Tuipuiral: Play 2, Won 0, Loss 2 - Point 0

FIXTURE:
JUNE 16 (ZIRTAWPNI):
03:30 pm: Kanan v Power Department Sporting Club (hmeichhia)
08:00 pm: TNT v Chhinga Veng Spikers (mipa)

JUNE 17 (INRINNI):
03:30 pm: Durtlang v Luangmual (hmeichhia)
08:00 pm: Hunthar v Tuipuiral (mipa)