Kum kal taa hun chhe tak an hman tawh hliahkhuhin Ather Pro Volleyball League-ah ṭha takin Durtlang North-in bul an ṭan a, ningani zanah 3-1-in kai thar Hlimen an hneh.

LPS Arena, Falkland-ah Shashank Kandpal chuan kawng dikah hruaiin hun pawimawhah Hlimen aiin an paukhauh a, 28-26, 28-26, 22-25, 25-18-a an chak rualin 2022 champion an nih hnua Pro Volleyball inkhela an chak leh hmasak ber a ni.

Durtlang North hian champion lai ni chungin nikumah vawi nga an khel a, tlawm vekin league pal tlang zo lovin an tla. An player langsar Fabian Lallunghnema, Vanlalṭanpuia leh Vanlalmawia te an chhuak a, Mizo player hriat hlawh tham an neih belh lo.

Mahse, Uttarakhand aṭangin Shashank an la lut a, a inlan hmasak berah point 29 hmuin point riat a hloh a, Kuriz Player of the Match lawmman a dawng nghal. Short ball vawtu Thangminlal Guite chuan point 17 leh Khawbel tlangval Johan Vanneihsanga'n ṭum 16 vaw tlain vawi sarih ve ve an tisual a ni.

Pro Volleyball-a an tel hmasak berah Mizo hlangin Hlimenin beiseiawm takin an khel nghal a. Set hmasa pahnih la zawn thei turin lehlam aiin hun ṭha an nei hmasa ve ve a; mahse, inelna sanga tawn hriat tlachham an player-ten an su tlang zo lo.

Hlimenin player langsar an kawl lo va, inpumkhatna leh thawh hona hmachhuanin anni aia rin hlawh Durtlang North nen set thumna thlengin an inhnehtawk hle. Kai thar tan Joseph Lalbiaksanga'n fel fai takin a khel a, point 10 thawk chhuakin vawi thum chiah a tisual a, Zolungmuana leh PC Lalnuntluanga'n point 14 ve ve hmuin point kua leh 10 an hloh a, filawr bik awm lovin intluktlang takin an khel.

Set hmasa berah veikhawr Rozuala Hnamte chuan a hlap tlak hnuah lehlamin tisual zui ve lehin 24-22-in Hlimen an sang. Point khat hmuh belha set la mai tur an nih laiin Vanlalthlamuanpuia (Mapuia) chuan point hlohin Rozuala vuak an dansak bawk a, 24-24-in Durtlang North-in an nih rual.

A hnuah Rozuala'n vaw tlain 25-24-in an sang leh a, Mapuia'n a service kai lo. Hlimenin anmahni tihsual vangin hun ṭha an bawhpelh zel a, 26-25 a nih laiin Lungmuana'n line pawnah vaw chhuakin lehlamin a vuak an dansak zui leh bawk. 27-26-in Durtlang North an sang ve thung a, hetih lai hian Hlimen captain Joseph-a'n a hlap sual a ni.

Set hnihnaah 24-23-in Hlimen an sang leh a, Shashank chuan vaw tlain a dang. A hnuah 25-24-in kai thar bawkin tlang theihna remchang nei leh mah se Durtlang North an ding nghet a, 26-26-a nih laiin Shashank chuan a hlap tla a, Rozuala'n chhang let thei lovin line pawnah a vaw chhuak.

Uiawm taka set an hloh zawn hnuah Hlimen an intuai thar a, set thumnaah inhnehtawk taka 21-21 thlenga an intluk hnuah point khat chiah an hloh belh a, a vawi khat nan Pro Volleyball inkhelah set an la.

Mahse, Durtlang North nawr let dang hneh lovin an zuih leh nghal a, Johana leh Shashank bakah Thanga'n 2022 champion fuih phurin derthawng lovin an tlang a, set linaah team ṭha zawk an nihna chiang zawkin an lantir.

May 4-ah Durtlang North-in champion lai Thutak Nunpuitu Team an khelhpui leh dawn a, May 7-ah mipa team paruk zinga Mizo hlanga khel pahnih zinga mi Hlimenin Hunthar an hmachhawn ang.

STATS

DURTLANG NORTH

Shashank Kandpal : point hmuh 29, point hloh 8

Thangminlal Guite : point hmuh 17, point hloh 7

Johan Vanneihsanga : point hmuh 16, point hloh 7

H Malsawmsanga : point hmuh 9, point hloh 9

Zodinpuia : point hmuh 4, point hloh 3

HLIMEN

Zolungmuana : point hmuh 14, point hloh 9

PC Lalnuntluanga : point hmuh 14, point hloh 11

Rozuala Hnamte : point hmuh 12, point hloh 10

Joseph Lalbiaksanga : point hmuh 10, point hloh 3

Vanlalthlamuanpuia : point hmuh 7, point hloh 2

FIXTURE

April 26, zirtawpni 8:00pm :

BUNGKAWN V LUANGMUAL (hmeichhia)

April 27, inrinni 8:00pm :

TUICHANGRAL V CHHINGA VENG SPIKERS (mipa)