Mizo hlanga an khelh hmasak berah Luangmualin set khat hloh ve mah se 15-6, 15-12, 15-17, 15-11, 15-9-in Bungkawn lakah an chak a, point li an thawk chhuak.

Season liam ta khan Gujarat atangin Nipa Barad an la lut a, kai thar ni chungin chiang takin an champion. LPS Arena, Falkland-ah an chet that chhunzawmin Pro Volleyball-a an inlan tawhah chak vekin khelh kua an chak zawnna a ni.

Tun season Pro Division inelna MVA Cup-ah state pawn player tel lovin an champion a, Mizo player-ten an theihna lantir chhunzawmin Lalbiakngheti'n point khat chiah hlohin point 12 a hmu a, Kuriz Player of the Match lawmman a dawng.

A kawppui Lalramliani'n point 15 thawk chhuakin vawi ruk a tisual a, set hmasa pahniha che tha B Tlangmawii Varte chuan Luangmual tan vawi 12 vaw tlain point li a paih a ni.

Hmeichhe team panga zingah state dang atanga player la lut awm chhun Luangmualin nikuma an hlawhtlinpui tawh Nipa bakah Chennai atangin Railways player Shaalini Saravanan be fel tawh mah se an chhawr nghal lo.

Bungkawnin anni aia zuan zang leh chet vel awlsam zawk el turin harsat an tawk a, set hnih an hloh zawn hnuah tawn hriat an neih chhawrin set thumnaah an kir leh hram. Vawi thum an deuce hnuah F Lalparmawii'n Remlalnghaki vuak dang thlain set an la a, point khat an hlawh chhuak.

Mahse, thothang tha zawk Luangmualin inkhel thunun zui lehin set hnuhnung pahnihah Biaki leh Rami'n an thawh hlawk a, setter Lallianchhungi'n hmun pawimawh tak a luah bawk.

Bungkawn tana khel tha ber F-i'n point 10 hmuin point ruk a hloh a, FP Lalduhkimi'n vawi ruk vaw tlain tum li a tisual ve thung a, mi dang awmze nei thama point thawk chhuak an awm lo.

Hmeichhe league-ah point 15 game hmangin set nga zel an khel a; kar leh nilaini zanah Luangmualin anni ang bawka chak tawh Diakkawn an khelhpui dawn a, zirtawpni zanah Bungkawnin Diakkawn tho an hmachhawn ve leh ang.

STATS

LUANGMUAL

Lalbiakngheti : point hmuh 12, point hloh 1

Lalramliani : point hmuh 15, point hloh 6

B Tlangmawii : point hmuh 12, point hloh 4

Laltluangzeli Colney : point hmuh 4, point hloh 2

Lalhriatpuii : point hmuh 3, point hloh 1

Lalnunpuii : point hmuh 1, point hloh 4

Remlalnghaki : point hmuh 0, point hloh 3

BUNGKAWN

F Lalparmawii : point hmuh 10, point hloh 6

FP Lalduhkimi : point hmuh 6, point hloh 4

Chinlunkimi : point hmuh 6, point hloh 7

RK Lalfakmawii : point hmuh 3, point hloh 2

Lallawmawmi : point hmuh 2, point hloh 5

Rody Lalzuiliani : point hmuh 2, point hloh 5

FIXTURE

April 27, inrinni 8:00pm :

TUICHANGRAL V CHHINGA VENG SPIKERS (mipa)

April 29, thawhtanni 8:00pm :

SERKAWN V DURTLANG (hmeichhia)

April 30, thawhlehni 8:00pm :

TUICHANGRAL V THUTAK NUNPUITU TEAM (mipa)