Pro Volleyball: Hmeichhe inkhel hmasa berah Diakkawnin Serkawn hnehin point nga an hlawh chhuak.

Hmeichhe inkhel hmasa berah kai thar ve ve an intawng a, Mizoram volleyball inelna sang bera an inlan vawi khatna ve ve a ni nghal. Diakkawn tan senior player leh tawn hriat nei ve ve Dingi leh Muani'n rin tlakin an khel a, 15-8, 15-7, 15-8, 17-15, 15-11-in an chak.

LPS Arena, Falkland-ah fa a neih hnua kir leh Dingi'n point 16 hmuin vawi khat chiah a tisual a, Kuriz Player of the Match-a thlan a ni. A kawppui Muani'n point 16 tho hlawh chhuakin point ruk a paih a, Kolasib team-in set nga an lak fai vek avangin point nga an hmu nghal.

Serkawn tan kum lama la naupang zinga player hriam tha Elisian Medai leh R Laltleipuii chuan hmun pawimawh luah mah se set an thawk chhuak zo lo. Elisian chuan point 15 hmuin 10 a hloh a, Tleipuii'n vawi kua vaw tlain point ruk a paih a ni.

Point 15 game hmangin hmeichhe league khelh a ni a, set nga zel khelin set khat lakah point khat zel an hmu a. Lunglei team-in point khat mah hmu lovin bul an tan a, April 27-ah Durtlang nen an inkhel leh ang. May 1-ah Diakkawn inlan ve lehin champion lai Luangmual nen an inhmachhawn dawn a ni.

Pro Volleyball hmeichhe inelnaa Aizawl pawn team an tel hmasak berah kum khat ve ve chiaha upa team pahnihin chona thar an hmachhawn a. A tir atangin Diakkawnin inkhel an thunun a, Mizoram volleyball-a langsar leh sang tak thleng tawh Dingi leh Muani bakah VL Hmangaihzuali'n awmze neiin a khel a, point 10 hmuin tum thum a hlah a, an elpuite hliah khuhin awlsam takin set thum an la zawn.

Set linaah Muani'n Elisiani vuak a dansak hnuah setter Lalrinzuala'n point a hmu zui ve leh a, Diakkawnin 13-9-in hma an hruai. Serkawnin anni aia tawn hriat nei player an hmachhawn a, a tir atangin ngampa taka khelh an harsat. Point hnih hloh belha set li hloh zawn thei dinhmuna an awm hnuah Elisian chuan team a fuih phur a, point nga an hmu zawn.

A vawi khat nan point khat neih belha set la thei dinhmunah Serkawn dingin 14-13-in hma an hruai let. Muani'n hlap tlain Diakkawnin an nih rual a, Elisiani'n vaw tla ve lehin 15-14-in an sang leh. Mahse, inelna nasa leh boruak sangah Kolasib team-in an hriam zawk tih lantirin point thum hmu zawnin an tlang.

Set khat tal lak tumin Serkawnin an bei zui a, set lina tawp lam atangin inrintawk zawk leh el thamin an inlan. Captain Tleipuii'n a vuak kai loh hnuah hlap tlain set hnuhnung berah 11-11-in lehlam an nih rual. Mahse, tihsual nei mang lo leh fel fai taka khel Dingi'n hun pawimawhah Diakkawn tan vaw tla zawnin 14-11-in hma an hruai thei a, Lunglei team tan dan theih an ni tawh lo.

STATS

DIAKKAWN

Vardingliani : point hmuh 16, point hloh 1

Lalmuanpuii : point hmuh 16, point hloh 6

VL Hmangaihzuali : point hmuh 10, point hloh 3

R Malsawmtluangi : point hmuh 4, point hloh 2

Hmingṭhazuali : point hmuh 4, point hloh 2

Ngunkhunhniangi : point hmuh 2, point hloh 4

SERKAWN

Elisian Medai : point hmuh 15, point hloh 10

R Laltleipuii : point hmuh 9, point hloh 6

Evelyn Malsawmtluangi : point hmuh 5, point hloh 2