ZALEN, May 28, 2026: Hnehna kawngah Hunthar kir lehin Mizoram Rural Bank Pro Volleyball League nomawi chuhtu an nihzia an lantir thar leh a, Nilaini zana set thum set khata Tuichangral an hneh rualin zuamawm an ni lo tih an entir tel nghal.

An khelh hmasak vawi hnihah harsa lo takin Sihphir leh Khawbel an hneh zawn a, rin an hlawh lai takin a mawnga awm leh khelh thum tlawm zawn lai, Thutak Nunpuitu Team hmaah Inrinni khan Hunthar an che sual a, an nihna an hloh phah hle.

Mahse, an inlan leh hmasak berah Tuichangralin league kal meka vawi thum chak zawn hmasa ber nih an tumna dangin pahnihnaah an insawh nghet a, vawi li an khelh tawhah point 10 hmuin anni aia vawi khata khel tam, Anastasia Electric Veng aiin point khatin an hniam.

Hunthar tana ball vaw tlatu, Suryansh Tomar leh Fabian Lallunghnema tenn an elpui leh Tuichangral innghahna, Mahela Indeewar leh Saidingpuia Sailo an khum a, Uttar Pradesh spiker chuan point 32 hmuin 11 a hloh va. Khaw chhak team-in Sri Lanka atanga an lak luh, Mahela chuan vawi 29 a vuak tlak chanve point a hloh va. Kolasib chhuanvawr, Fabian-a’n tum 17 hlap tlain vawi nga a tisual a, Khawhai tlangval Saitea’n point 18 a hmuh zahve a paih ve thung.

Hunthar captain Remsangzuala (Lalmama) chuan team pahnih inkarah danglamna a thlen a, team khai khawmtu a nih piah lamah point khat hlohin point sarih a hlawh chhuak a, league kal mekah setter zinga Kuriz Player of the Match lawmman dawng hmasa ber a ni.

Tuichangralin Khawbel an hneh lo nghal a, a hnuah TNT leh champion lai, Anastasia hneh zawnin hma lam an pan a, team boruak tha tak hnuaiah kar khat chuang inbuatsaihna hun nei chungin Hunthar hmaah an inlan.

Set hmasa ber la thei tura 16-11-a hma an hruai hnuah an inpawh thlaktir bakah Anastasia an hneh tuma point 40 hmu thei, Mahela a khauh tawk lo va, a kutthlak a nat loh bakah team-in an mamawhna a san hun lai, set linaah a zuai leh zual.

A vawi khat nan champion thei tura Tuichangralin beiseina an neih tawh a tla hniam leh a, table-ah pathumna luah zui mah se vawi li an khelh tawhah Chhinga Veng Spikers nen point ruk ve ve hmuin set an lak zat a inang a, set hloh tlem zawk an nih vangin an sang zawk a. Zirtawpni zanah Chhinga Veng nen an intawng dawn a, team pahnih tan a pawimawh dawn hle a ni.

Round linaah khawchhak team awlin hun awl an neih hnem vangin an fei phah lo va. A tir lamah Mahela chuan lehlam tihbuai phak lohin sang tak atangin a vaw tla a, set khatna laihawl thlengin team tan beiseina a siamsak.

16-11-a hniam zawk an nih hnuah Hunthar insiam tha hret hretin, Suryansh leh Lalbiakmuana ten an vuak tlak hnuah Lalbiakmawia Khiangte chuan Lalrinpuia hlap a dansak a, 20-20-in an nih rual.

TNT hmaah rilru lama fiahna pal tlang lo mah se hun pawimawhah Hunthar an paukhauh a, Suryansh chuan vaw tlain Tuichangralin an chhang let nghal thei lo va. Fabian-a’n a hlap tlak hnuah Saitea vuak a dansak leh a, point khat hmuh belha set la thei turin 24-22-in an kalsan a. Dang thei turin Mahela chuan hun tha tum hnih a nei zawn a, a hmasa zawk vaw tla mah se a hnuhnung zawkah a hlap kai lo.

Set hnihnaah Hunthar intel ruh leh zualin an chungnung a, tawn hriat nei tha Lalmaman ball thununin tha taka a vawrh bakah a hui tla tel bawk a, 13-13 atangin ball vuak tlak leh lehlam hlap dan kawngah Tuichangralin an el zo lo.

Set thumnaah erawh khaw chhak team infuihin fel fai zawkin an khel a, tha takin Mahela leh Saitea an inthlawp a, Rinpuia’n lehlam hlap dang fovin a ball hmuh point-ah a chantir thei bawk a. 22-22 a nih hnuah Mahela leh Saitea ten khuang nen a ring thei ang bera anmahni au phurtute beisei tihlawhtling an vaw tla zawn a, set khatna an hloh dan ang chiahin an la a, au thawm a ring hle.

Tuichangralin kir leh tura beiseina an neih laiin an innghahna, Mahela chuan beisei a pha lo zui a, a ball hlap a nat loh bakah a tir lam angin a zuan a zang lo va, vuak tlak a harsat. Huntharin nawr letin thothang tha leh tlak hniam nei lovin hovin mar takin an khel a, set thum la thei tura 18-12-a an kal fal hnuah phu takin set lina an la.

A vawi thum nan Hunthar an chak rualin an khelh tawhah point an la hmu vek a, Inrinni zanah Anastasia nen hmahruaitu nih inchuhin an intawng dawn. 

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 5 - May 27, 2026 )Nilaini)

Hunthar def Tuichangral (mipa)

25-22, 25-20, 25-21 (3-0)

Kuriz Player of the Match - Remsangzuala (Hunthar)

Cheetak Fan of the Night - Lalruatkima (Kanan Veng)

MVA Lucky Fan - Amanda Fanai (Hunthar), Vanlalruati (Hunthar)

STATS:

HUNTHAR

Suryansh Tomar: Point Hmuh - 32, Point Hloh - 11

Fabian Lallunghnema: Point Hmuh - 17, Point Hloh - 5

Wilson Lalremruata: Point Hmuh - 6, Point Hloh - 2

Lalbiakmawia Khiangte: Point Hmuh - 4, Point Hloh - 2

Lalbiakmuana: Point Hmuh - 5, Point Hloh - 6

Remsangzuala (setter): Point Hmuh - 7, Point Hloh - 1

TUICHANGRAL

Mahela Indeewar: Point Hmuh - 28, Point Hloh - 14

Saidingpuia Sailo: Point Hmuh - 18, Point Hloh - 9

Lalrinpuia: Point Hmuh - 13, Point Hloh - 3

Amos Vanlalpeka: Point Hmuh - 2, Point Hloh - 1

Zonunsanga: Point Hmuh - 3, Point Hloh - 3

H Lalramdinmawia (setter): Point Hmuh - 0, Point Hloh - 2

POINT TABLE

ANASTASIA: Play 5, Won 3, Loss 2 (set lak 13, set hloh 8) : Point 11

HUNTHAR: Play 4, Won 3, Loss 1 (set lak 11, set hloh 1) : Point 10

TUICHANGRAL: Play 4, Won 2, Loss 2 (set lak 9, set hloh 8) : Point 6

CHHINGA VENG: Play 4, Won 2, Loss 2 (set lak 9, set hloh 9) : Point 6

SIHPHIR: Play 4, Won 2, Loss 2 (set lak 7, set hloh 8) : Point 5

KHAWBEL: Play 4, Won 2, Loss 2 (set lak 7, set hloh 9) : Point 5

TNT: Play 5, Won 1, Loss 4 (set lak 5, set hloh 13) : Point 2

FIXTURE (Mipa) - Round 6

May 28, 2026 (Ningani)

8:00 PM : Sihphir v Khawbel

May 29, 2026 (Zirtawpni)

8:00 PM : Chhinga Veng Spikers v Tuichangral 

May 30, 2026 (Inrinni)

8:00 PM : Hunthar v Anastasia Electric Veng