Thutak Nunpuitu Team-in an hmabak hlen zelin Nilaini zanah 3-1-in an elpui kumhlun, Hunthar an hneh a, chak fai vek chungin Tata SK 712 Pro Volleyball League semifinal an lut.

Knockout round lut chiang sa tawh ve ve ni mah se Mizoram volleyball-a team langsar pahnih inkarah inelna danglam leh nasa a lang chhuak thar leh a; 25-23, 25-17, 20-25, 25-22-in an an chet that vanglai hmang mek, TNT an chak.

R Dengthuama Indoor Stadium, Mualpuiah a khatin mipui an pung khawm a. Net bula Hunthar vuak dang hnem tak, Zosangzuala (Mama) chuan point 16 hmuin tum li a hloh a, a vawi khat nan D3 Business Player of the Match lawmman a dawng.

League vawi nga an khelhah TNT chak vekin Vanlaltanchhana (Valbuanga) chuan tum 26 vaw tlain point 13 a paih a, khel tha bera thlan a nih loh hmasak berah intel ruh leh tha takin an thawk ho a, Huntharin su tlang an harsat.

Mizo hlanga champion hmasa ber ni thei turin TNT-in rin an hlawh fal ta viau a, point hloh lovah league an khelh zawh hnuah Tuipuiral leh Tuichangral chak zawk nen semifinal-ah an intawng ang.

Season kal meka trophy pahnih la tawh Huntharin rin ber ni chungin Pro Volleyball an khel a. Derthawng lova vawi hnih an chak zawn hnuah Inrinni khan kai thar, Tuipuiral lakah set hnih an hloh a, chak tho mah se an lakah rinhlelhna a awm phah.

TNT hmaah rin tlak an nihzia lantir zo lovin set hmasa pahnih an hloh zawn nghal a. Set thumna tirah beisei pha lo, Gagandeep Singh la chhuakin an hahchawlhtir tluan a, Zomuansanga’n hmun pawimawh luahin vawi 21 a hlap tla a, point 14 paihin set khat bak an sual chhuak zo lo.

Tun season nghet leh tlo taka insiam lian tawh, Hunthar player leh team pum puiin an nihna an hloh then nasa. Rinrawla an hman, thin Laldensanga’n vawi khat chiah vaw tlain point ruk a paih a, Lalramnunfela’n point riat hmu mah se Densanga tihsual zat tho a hloh.

Team tichak tura Punjab atanga an lak luh, Gagan chuan set hnih a khelh chhungin point 11 a thawk chhuak na a, tum sarih paihin lehlamin net bulah a vuak an dansak tam a. A khelh chhungin a che a zuai hle a, team boruak a pawt hniam.

Pathumnaa awm mek, Huntharin Zirtawpni zanah league an khel zo dawn a, semifinal hmaa an dinhmun siam nghet thar leh tumin an chung chiaha inhung, Chhinga Veng Spikers an hmachhawn ang.

Set khatnaah insawrbing takin an inbei tawn a, Gagan chuan vaw tlain Huntharin tlang theihna hun tha an nei hmasa a, 24-23-in hma an hruai a. Zomuana’n remchang hmu zuiin a hlap a, ban phar sang tak, Valbuanga’n a dan thlaksak.

Sadraka Fanai chuan hui tla ve lehin TNT-in 25-24-in hma an hruai let a, point khat hmuh belha set lak theihna hun an neih hmasak berah captain Vanlalchhantluanga Sailo chuan point hlu tak a thawk chhuak.

Set hnihnaah 17-17 thlengin an intluk chho leh a. Setter Lalliankima’n fing taka a hui tlak atangin TNT-in point riat an hmu zawn a, set an la zawn a. Hetih chhung hian Hunthar talbuaiin Densanga leh Lalruatfela Sailo chuan court pawnah an vaw chhuak a, 24-17-a an hniam laiin Gagan chuan a nam kai lo bawk.

Set thumna tirah 2-2 a nih laiin Hunthar coach VL Malsawma Renthlei chuan Gagan a la chhuak a. Khawhai tlangval, Zomuana chungah rinna a nghat, Mizo hlangin an khel atangin hneh takin an nawr let.

Inkhel thununin a tira lut paruk zinga tel lo, Lalhruaizela’n rang takin a vaw tla a, 23-15-in an sang zui a. TNT tan set hloh a hnai a, Valbuanga la chhuaka an hahchawlhtir hnuah point nga hmuh belh thei mah se fal taka hmahruai tawh, Hunthar an dal zo tawh lo.

Set an hloh hnuah TNT insiam thar lehin vaw tla thei zawk an nih bakah lehlam vuak dang tura net bula an ban pharin awmzia a nei a, 20-14-in hma an hruai a. Huntharin vuak tlak an harsat laiin Zomuana an chhawr rim a, ani’n beiseina siamsakin 21-21-in an nih rual ve leh hman.

Mama’n tum hnih vaw tla zawnin TNT thinphu a tireh a, che fuh thei lo Densanga’n a vuak sual hnuah 24-22-in Hunthar an hniam a. Mipui thawm ri hum hum karah Valbuanga’n tha zetin a vaw tla a, team pahnih inkar a ching fel a ni.

Pro Volleyball-a an intawn hnuhnun vawi hnihah TNT an chak zawn a; nikum khan league-ah Huntharin set thum la zawnin chungnung takin an hneh a. Mahse, semifinal-ah TNT-in an tlawmna chhang letin 3-2-in Hunthar an vaw tla.

Pro Volleyball hmasa ber, 2016 khan league-a sang ber ni chungin TNT an champion zo lo va. 2022 khan tuna TNT-in league-a an bitum an hneh fai vek ang hian Huntharin chungchuang takin knockout round an lut a; mahse, final thleng pha lovin an tla.

Stats:
TNT:
Vanlaltanchhana: point hmuh - 26, point hloh - 13
Zosangzuala: point hmuh - 16, point hloh - 4
Sadrak Fanai: point hmuh - 11, point hloh - 5
Laldinchhunga: point hmuh - 9, point hloh - 6
Vanlalchhantluanga Sailo: point hmuh - 6, point hloh - 4
K Zodingliana: point hmuh - 2, point hloh - 0

HUNTHAR:
Zomuansanga: point hmuh - 21, point hloh - 14
Lalnunfela: point hmuh - 10, point hloh - 5
Gagandeep Singh: point hmuh - 11, point hloh - 7
Lalramnunfela: point hmuh - 8, point hloh - 6
Laldensanga: point hmuh - 1, point hloh - 6

POINT TABLE:
1. Thutak Nunpuitu Team: Play 5, Won 5, Loss 0 - Point 15
2. Chhinga Veng Spikers: Play 4, Won 3, Loss 1 - Point 9
3. Hunthar: Play 4, Won 3, Loss 1 - Point 8
3. Tuipuiral: Play 4, Won 1, Loss 3 - Point 3
5. Tuichangral: Play 4, Won 1, Loss 3 - Point 2
6. Durtlang North: Play 5, Won 0, Loss 5 - Point 2

FIXTURE:
JUNE 22 (NINGANI):
03:30 pm: Luangmual v Kanan (hmeichhia)
08:00 pm: Tuichangral v Tuipuiral (mipa)

JUNE 23 (ZIRTAWPNI):
08:00 pm: Chhinga Veng Spikers v Hunthar (mipa)