LPS Arena, Falkland-ah Mizo hlanga khel Hlimenin theihtawp chhuah mah se team pahnih theihna a inthlau a, Hunthar spiker Anurag Rawat chuan point 11 hlohin tum 28 a vaw tla a, 25-17, 25-20, 25-18-in an chak.

Thutak Nunpuitu Team leh Chhinga Veng Spikers an hneh hnuah Hlimen lakah harsa lo takin Hunthar an chak zui leh a, Delhi atanga an lak luh Anurag chuan a vawi thum nan Kuriz Player of the Match lawmman dawngin semifinal an lut fel ti tih tawh.

Kai thar Hlimen tan PC Lalnuntluanga leh Zolungmuana'n vawi 11 ve ve hlap tlain point thum leh point li an hloh a; a umtu zawkah tang tluanin an kut pharna chung atanga vaw tla thei Anurag an dang thei lo va, Delhi tlangval service an lak theih loh hnuah 16-10-in Huntharin set khatnaah hma an hruai.

Hlimenin el thama inlan an harsat a, set hnihnaah Nuntluanga'n point a hmuh hmangin 18-16-in an hnaih hman mah se, Lalnunfela'n a hlap tlak hnuah a hnung atangin Anurag chuan a vaw tla zui ve leh a, 22-17-in Huntharin an kalsan a, set khatna ang bawkin derthawng lovin an tlang.

Coach VL Malsawma Renthlei chuan set hmasa ber an lak hnuah setter rinrawl Remsangzuala hahchawlhtirin veteran C Laldawngkima a luhtir a, set thumnaah player hmun chang tam lote tan hun tha a siamsak bawk a, harsatna an tawh phah lo.

Set thumnaah 18-15-a hniam zawk an nih laiin Hlimenin tha takin an bei let a, Nuntluanga'n a vuak tlak hnuah Lalhruaizela hlap an dansak a, Hunthar spiker Fabian Lallunghnema'n vaw sual ve lehin 18-18-in an nih rual chho.

Mahse, team pahnih an inthlau tih a lang zui a, Anurag leh Fabian-a'n Hunthar fuih phurin an invuak tlak chhawk a, Hlimen dang char chungin point sarih an hmu zawn a, boruak a san laiin hriam takin an inlan.

Fabian-a'n tum 11 hlap tlain point hnih a hloh a, C Lalhriatpuia'n point sarih thawk chhuakin vawi khat a tisual bawk. Hunthar an inpumkhat telh telh a, ni 11 an awl hnu May 18 zanah Tuichangral nen an intawng dawn a, an dinhmun chiang zawka a lan theihna tur inkhel pawimawh tak a ni ang.

Pro Volleyball-a an tel hmasak berah Hlimenin state pawn player la lut lovin inelna an hmachhawn a, vawi hnih an khelh tawhah tlawm zawnin Durtlang North hmaah set khat an la ve a, May 14 zanah khel lehin Tuichangral nen an intawng dawn a ni.

STATS

HUNTHAR

Anurag Rawat : point hmuh 28, point hloh 11

Fabian Lallunghnema : point hmuh 11, point hloh 2

C Lalhriatpuia : point hmuh 7, point hloh 1

Wilson Lalremruata : point hmuh 4, point hloh 1

Lalnunfela : point hmuh 4, point hloh 1

R Lallawmkima : point hmuh 2, point hloh 0

Lalhruaizela : point hmuh 1, point hloh 3

Lalbiakmawia : point hmuh 2, point hloh 1

Remsangzuala (setter) : point hmuh 1, point hloh 2

HLIMEN

PC Lalnuntluanga : point hmuh 11, point hloh 3

Zolungmuana : point hmuh 11, point hloh 4

H Lalchhuanawma : point hmuh 7, point hloh 2

Rozuala Hnamte : point hmuh 4, point hloh 5

Vanlalthlamuanpuia : point hmuh 2, point hloh 3

POINT TABLE

HUNTHAR : Play 3, Won 3, Loss 0, Point 9

THUTAK NUNPUITU TEAM : Play 3, Won 2, Loss 1, Point 5

TUICHANGRAL : Play 2, Won 1, Loss 1, Point 4

DURTLANG NORTH : Play 2, Won 1, Loss 1, Point 3

HLIMEN : Play 2, Won 0, Loss 2, Point 0

CHHINGA VENG SPIKERS : Play 2, Won 0, Loss 2, Point 0

FIXTURE

May 8, nilaini 8:00pm :

DURTLANG V BUNGKAWN (hmeichhia)

May 9, ningani 8:00pm :

CHHINGA VENG SPIKERS V THUTAK NUNPUITU TEAM (mipa)

May 10, zirtawpni 8:00pm :

SERKAWN V LUANGMUAL (hmeichhia)

May 11, inrinni 8:00pm :

DURTLANG NORTH V TUICHANGRAL (mipa)